FILA: Kúres erejelerine ózgerister engizildi
ASTANA. 19 mamyr. QazAqparat - Halyqaralyq kúres federatsııasy (FILA) sporttyń bul túrin Olımpıada oıyndarynyń baǵdarlamasynda saqtap qalý maqsatynda qoldanystaǵy erejelerge keıbir ózgerister engizý týraly sheshim qabyldady.
Senbi kúni Máskeýde ótken FILA kongresinde palýandardy jańa júıe boıynsha baǵalaý, áıelder arasyndaǵy kúrestiń salmaq dárejesiniń sanyn kóbeıtý, qazir eki mınýttyq úsh kezeńnen turatyn jekpe-jek uzaqtyǵyn endi úsh mınýttyq eki kezeńge aýystyrý sııaqty jańa erejeler qabyldandy.
FILA prezıdenti Nenad Lalovıch bul ózgerister kúrestiń olımpıadalyq oıyndar sanatynda qalýyna septesedi degen úmit bildirdi.
Aqpan aıynda halyqaralyq olımpıada komıteti 2020 jyly ótetin olımpıada baǵdarlamasynan kúresti alyp tastaý týraly usynys aıtqan edi. Bul másele boıynsha túpkilikti sheshim bıyl qyrkúıekte Býenos-Aıreste qabyldanady, dep habarlaıdy «Azattyq».
