FILA qazaqsha kúresti olımpıada deńgeıine deıin kóterýge kúsh salmaq
ASTANA. Qazannyń 21-y. QazAqparat /Arman Asqarov/ - Aldaǵy ýaqytta biz qazaqsha kúresti olımpıada deńgeıine deıin kóterýdi kózdep otyrmyz. Bul týraly Astanada ótetin qazaqsha kúresten III Álem chempıonaty aıasynda uıymdastyrylǵan baspasóz máslıhatynda Halyqaralyq kúres túrleri qaýymdastyǵynyń (FILA) úılestirýshisi Anna Pılaý málim etti.
Onyń sózine qaraǵanda, buǵan deıin FILA aǵylshyndardyń kúresin jan-jaqty nasıhattap kelse, búginde onyń negizgi maqsaty - ár halyqtyń ulttyq kúres túrlerine qoldaý kórsetý. «Ulttyq kúres ókilderiniń basyn qosyp, halyqaralyq deńgeıge shyǵarý - bizdiń negizgi mindetimiz. Osy oraıda erteń Astanada ótetin qazaqsha kúresten III Álem chempıonatynyń V Dúnıejúzilik kúres oıyndarymen qatar ótkizilýi qazaq halqynyń ulttyq sportynyń joǵarylap kele jatqandyǵyn kórsetse kerek», - deıdi A.Pılaý.
Óz sózinde qazaqsha kúresti halyqaralyq deńgeıge shyǵarý jolynda osy sport túrin ákimshilik jaǵynan tıimdi basqarý qajettigin erekshe atap ótken ol qazaqtyń ulttyq sportyn sheteldik aqparat quraldary arqyly keńinen nasıhattaýdyń mańyzdylyǵyna toqtaldy. «Biz óz tarapymyzdan jan-jaqty kómek kórsetetin bolamyz. Sebebi, qazaqsha kúres FILA -nyń resmı kúntizbesine endi. Basty maqsatymyz - qazaq kúresin resmı sport túrleriniń qataryna qosý bolmaq. Osy kúrestiń jergilikti jerdegi sport túri retinde emes, resmı, ıaǵnı dúnıejúzine tanylǵan sport túri retinde bekitý jolynda qyzmet etetin bolamyz. Árıne, olımıpada deńgeıine deıin kóterý qıyn. Biraq biz osy jumysqa da kúsh salatyn bolamyz», - dep atap kórsetti. A.Pılaý.
