Fılmdi memlekettik tilde kórgisi keletinder kınoǵa túnde barýǵa májbúr – mınıstr
A.Oralov vıtse-mınıstrlerdiń, komıtet tóraǵalarynyń jáne baǵynysty mekeme basshylarynyń qatysýymen apparat keńesin ótkizdi. Kún tártibindegi basty taqyryp – kórermen suranysyna ıe kassalyq fılmderdi memlekettik tilde dýblıajdaý.
«Jyl basynan Qazaqstanda birneshe iri kınopremera ótti. Olardyń keıbiri qazaq tilinde dýblıajdyń bolmaýyna baılanysty kórermenniń nazarynan tys qaldy. Men halyqtyń pikirin baqylap otyrmyn. Bul máseleni eshqashan esten shyǵarmaımyz. Kassalyq fılmder aýdıtorııaǵa memlekettik tilde qoljetimdi bolýy kerek. Mysaly, byltyr Mádenıet jáne sport mınıstrliginiń qoldaýymen kórermen qyzyǵýshylyǵyn týdyrǵan 3 kınopremera qazaq tilindegi dýblıajben shyqty. Bıyl mádenıet salasyn damytýdyń 7 jyldyq tujyrymdamasyn ázirlep, Úkimet qaýlysymen bekittik. Endi jyl saıyn kem degende 15 kınopremeraǵa qazaq tilinde dýblıaj jasalýy kerek degen mindet qoıdyq»,- dedi Ashat Oralov.
Aıta keteıik, naýryz aıynda Mádenıet jáne sport mınıstrligi memlekettik tilge dýblıaj jasaý úshin fılmderdi irikteý erejesin bekitti. Solaı, birneshe jylda jalpy prokattaǵy qazaq tilindegi fılmderdiń úlesin 30% deıin jetkizý josparlanyp otyr. Bul kórsetkish kassalyq sheteldik fılmderge memlekettik tilde dýblıaj jasaý arqyly da artýy tıis.
«Taǵy bir ózekti másele – qazaqsha dýblıajben shyǵatyn kartınalar seansy árdaıym kórermenge yńǵaıly ýaqytta qoıyla bermeıdi. Bul týraly da maǵan áleýmettik jelide jıi jazady. Fılmdi memlekettik tilde kórgisi keletinder kóbinese túnde kınoǵa barýǵa májbúr. Bul, árıne, durys emes. Biz kınoteatrlardyń jekemenshik kásip nysany ekenin túsinemiz. Degenmen de, memlekettik turǵydan biz dúnıejúzi kóretin kınopremeralardyń qazaq tilinde jáne yńǵaıly ýaqytta kórsetilýin qamtamasyz etýge mindettimiz. Sondyqtan jeke kásipkerlermen, kınoteatrlardyń ıelerimen osy baǵyttaǵy jumysty jandandyrýymyz qajet»,- dedi Ashat Oralov.
