Fılmder túsirý úshin sheteldik kınokompanııalarmen kelissóz júrgizilip jatyr - A.Muhamedıuly
ASTANA. QazAqparat - QR Mádenıet jáne sport mınıstrligi birlesken fılmderdi túsirý boıynsha sheteldik kınokompanııalarmen kelissózderdi júrgizip jatyr. Bul týraly búgin Ortalyq kommýnıkatsııalar qyzmetindegi baspasóz máslıhatynda atalǵan mınıstrliktiń basshysy Arystanbek Muhamedıuly málim etti.
«50/50 qaǵıdasymen birlesip qarjylandyrý arqyly «Qazaqfılm» AQ men jeke kompanııalarmen, onyń ishinde sheteldik kınokompanııalardyń áleýetin biriktirip, fılmder túsirý úshin ınvestıtsııalardy tartý jumystary júrgizilýde»,-dedi mınıstr. Osy baǵytta Ámire Qashaýbaevqa arnalǵan kıno joba boıynsha «Movia» prodıýserlik ortalyǵymen birlesken jumystar júrgizilýde. «Sonymen qatar, Qytaıda jáne Ońtústik-Shyǵys Azııanyń birqatar elderinde kınoteatrlar jelisin ıemdenip otyrǵan «Sky Orange» qytaılyq iri kınokompanııasymen kelissózder júrgizilýde. Bul turǵydaǵy jumystar qazaqstandyq fılmderdiń azıalyq naryqqa shyǵýyna jaǵdaı jasaýdy, sondaı-aq Qazaqstanda kıno qalashyqtar júıesin qurýdy qarastyratyn ınvestıtsııalyq jobany eskerip otyr»,-dedi A. Muhamedıuly.
