Fıktıvti baǵa, dıplom satyp alý: Túrkistandyq volonterler jemqorlyqpen qalaı kúresip jatyr
«Túrkistan oblysynda qoǵamdaǵy sybaılas jemqorlyqqa qarsy mádenıetti qalyptastyrý maqsatynda kóp is-shara atqarylýda. Men ózim osy oblystaǵy «Adaldyq alańynyń» jetekshisimin. Bıyl maýsym aıynda Túrkistan oblysynyń barlyq qala, aýdandarynda «Adaldyq alańy» jobalyq keńseleri ashylyp, jetekshileri qala, aýdan ákimderiniń shtattan tys keńesshileri retinde taǵaıyndaldy. Búginde Túrkistan oblysyndaǵy «Adaldyq alańy» jobalyq keńsesi aıasynda ózekti áleýmettik máselelerdi sheshýge atsalysqan 185-ten astam volonter bar. Olar turmystyq sybaılas jemqorlyqqa qarsy kúresti kúsheıtýge baǵyttalǵan 13-ten astam jobany iske asyrýda. Túrkistan oblysynda qoǵamdaǵy sybaılas jemqorlyqqa qarsy mádenıetti qalyptastyrý maqsatynda oblystaǵy 16 qala, aýdan aýmaǵynda 79 banner ornatyldy», - deıdi Túrkistan oblysy ákiminiń orynbasary Sáken Qalqamanov.
Onyń aıtýynsha, Túrkistan oblysynda 900-den astam mektep bar.
«Túrkistan oblysynda 465 myńnan astam oqýshy bar. 100 myńǵa jýyq mektep, kolledjder janynda qyzmetkerler jumys isteıdi. Óńirdegi 6 kolledjde stýdentterge fıktıvti baǵa qoıýǵa jáne olardyń bilim týraly qujatty satyp alýlaryna múmkindik bermes úshin kolledjderde pedagog, ata-analar komıtetiniń músheleri, belsendi stýdentterden quralǵan «Sanaly urpaq» jobalyq keńseleri ashyldy.
Sondaı-aq, jastar arasynda sybaılas jemqorlyqtyń aldyn alý baǵytynda túrli sharalar ótýde. Jyl basynan beri Jastar.kz jobasy aıasynda «Jastar sybaılas jemqorlyqqa qarsy» taqyrybynda stýdentterdiń qatysýymen aktsııalar uıymdastyrylýda. Kolledjderde «Parasyz sessııa» aktsııalary men «Jemqorlyqqa jol joq» jáne taǵy da basqa taqyrypta semınarlar men dóńgelek ústelder ótkizilip turady», - deıdi ol.