FIGHT NIGHTS GLOBAL 65 Astanada 3 chempıon beldigin oınatady
ASTANA. QazAqparat - Keshtiń eń mańyzdy oqıǵasy retinde tordyń qojaıyny Jalǵas Jumaǵulov pen Krasnodar kúreskeri Vartan Asatrıan arasyndaǵy eń az salmaq kategorııasyndaǵy (57.2 kg) jekpe-jek bolmaq.
FIGHT NIGHTS GLOBAL 65 dárejeli kezdesýde óz ónerin kórsetýge múmkindik alý úshin sambo kúresi boıynsha Reseı chempıony Artýr Bagaýtınovpen shaıqasý kerek edi.
Esterińizge sala keteıik, ústimizdegi jyldyń 31-shi naýryzynda Máskeý qalasynda aralas jekpe-jekten halyqaralyq FN GLOBAL 62 týrnıri ótken bolatyn. Bul jarysta qazaqstandyq faıter Jalǵas Jumaǵulov Gran-prıdiń jartylaı fınalynda reseılik Artýr Bagaýtınovpen kúsh synasyp, qarsylasyn nokaýtpen jeńdi.
Jalǵas Jumaǵulovpen shaıqas alańynda kezdesýden buryn jeńilip kórmegen daǵystandyq kúresker shyn mánisinde favorıt bolatyn. Biraq qandasymyz «Jako», ıaǵnı Jalǵas Jumaǵulov qaharly qarsylasyn ekinshi raýndta nokaýtqa túsirip, jurtty tań qaldyrdy.
Óz kezeginde Vartan Asatrıan FIGHT NIGHTS GLOBAL uıymynyń debıýtynda tájirıbeli kúresker jáne grepplıng sheberi Mıkael Sılanderdan asyp túsken bolatyn. Ol odan keıingi «Jaýynger» shaıqasynda da Ázirbaıjan ókili Elnar Ibragımovtan ústem bolyp, jekpe-jekte merziminen buryn jeńip shyqty. Bul jeńis Asatrıanǵa chempıondar jekpe-jeginiń qatysýshysy mártebesine ıe bolýǵa jaǵdaı týǵyzdy. Alaıda bizdiń Jalǵasqa bul kezdesý tórt jyl buryńǵy jeńilisi úshin Vartannan kek qaıtarýǵa erekshe múmkindik.
Keshtiń mańyzdy jekpe-jekteriniń birinde orta salmaqtaǵy (77.1 kg) chempıon ataǵy úshin talasta Qazaqstan jalaýyn kótergen Georgıı Kıchıgın men Reseı sportshysy Gadjımýrad Hıramagomedov betpe-bet kezdesedi.
Aıta keteıik, Georgıı Kıchıgınniń ótken jyldyń sońynda-aq FIGHT NIGHTS GLOBAL chempıony atanýǵa múmkindigi bar bolatyn, biraq onyń qarsylasy Magomed Nýrov osy salmaq kategorııasynyń sheńberine kire almaı, jekpe-jek keıinge qaldyryldy.
Óz kezeginde otandasymyzdyń qarsylasy aralas jekpe-jek boıynsha eki dúrkin álem chempıony atanǵan Gadjımýrad Hıramagomedov reseılik Irıı Izotov pen grýzııalyq Gıorgı Lobjanıdzeni nyq senimmen jeńip shyqty. Bul jetistigi oǵan basqa qarsylastary arasynan ozyp shyǵyp, dáreje úshin jekpe-jekte ózin-ózi kórsetý quqyǵyn ıemdenýge múmkindik berdi.
19 mamyr kúni aralas jekpe-jek jankúıerleri bul uıymnyń alǵash chempıonynyń esimin estip, sonymen qatar 83.9 kg salmaq kategorııasyndaǵy jeńimpazdy biledi. Dáreje úshin jekpe-jek Eagles klýbynyń múshesi Abýsýpııan Alıhanov pen «Krepost» klýbynan shyqqan Halıd Mýrtazalıev arasyndaǵy ózindik daǵystandyq qunan jarysy sııaqty bolǵaly jatyr.
Eki kúresker de birin-biri óz otanyndaǵy jattyqpa-mashyqtaný jıynynyń arqasynda ǵana bilip tanymaıdy, sonymen qatar Abýsýpııan men Halıd FIGHT NIGHTS GLOBAL komandalyq chempıonatynyń fınalynda ózara kúsh synasqan bolatyn. Sol keshte baq óz klýbyna chempıon ataǵyn alyp bergen Alıhanovqa buıyrǵan eken. Eagles kúreskeri sol baıaǵy jetisitgin qaıtalaı alar me eken, álde Halıd jeke mansabyndaǵy jalǵyz jeńilisi úshin kegin qaıtarady me eken, ony kórermender Qazaqstandaǵy týrnır aıaqtalǵan soń biletin bolady.
Kesh baǵdarlamasynda FIGHT NIGHTS GLOBAL uıymynyń myqty kúreskerleriniń qatysýymen bar-joǵy 10 jekpe-jek ótedi.
Aıta keteıik, FIGHT NIGHTS GLOBAL - Reseıdiń eń iri nasıhattaý kompanııasy. Ol álemdik juldyzdardyń qatysýymen aralas jekpe-jek boıynsha týrnırler ótkizedi. Kompanııanyń alǵashqy sharasy 2010 jyldyń maýsym aıynda Máskeý qalasynda ótti.
