FIFA: Jýrnalıster aldynda sóılemek bolǵan Blatterdiń betine bir býma dollardy shashyp jiberdi
ASTANA. QazAqparat - Tsıýrıhtegi baspasóz-konferentsııasy bastalmaı turyp, belgisiz bireý FIFA prezıdenti Zepp Blatterge bir býma dollardy betine shashyp jiberdi. Budan keıin Halyqaralyq fýtbol federatsııasynyń basshysy BAQ-pen kezdesýin keıinge shegerdi, dep jazady «VVS» agenttigi.
«Aldymen myna jerdi jınastyrýymyz qajet. Óıtkeni, mundaı jaǵdaıda men fýtbol týraly aıta almaımyn», - degen Blatter zaldan shyǵyp ketti.
10 mınýttan soń Blatter oralyp, baspasóz-konferentsııasy bastaldy.
Buǵan deıin habarlanǵandaı, FIFA-nyń atqarýshy komıteti 2016 jyldyń 26 aqpanynda merziminen buryn prezıdent saılaýyn ótkizý týraly sheshim qabyldady.
Mamyr aıynda besinshi merzimge qaıta saılanǵan Blatter jemqorlyqqa qatysty daýdan keıin 2 maýsymda otstavkaǵa ketetinin jarııalaǵan. Ol bul federatsııany 1998 jyldan beri basqaryp keledi.
