FIFA Series týrnıri: Astanadaǵy oıyndarǵa Kýveıt quramasy qatyspaıtyn boldy
ASTANA. KAZINFORM - Halyqaralyq fýtbol federatsııasynyń (FIFA) ulttyq quramalarǵa arnalǵan jańa formattaǵy FIFA Series týrnıriniń Astanada ótetin oıyndarynda endi úsh qurama baq synaıdy.
Alǵashqyda oǵan Qazaqstan, Namıbııa, Komor araldary jáne Kýveıt qatysady dep josparlanǵan edi. Endi Kýveıttiń bas tartýyna baılanysty oıyndardy aınalmaly júıe boıynsha ótkizýge sheshim qabyldandy.
Aldymen qazaqstandyq fýtbolshylar 25 naýryzda Namıbııamen sheberlik baıqassa, 31 naýryzda Komor araldarymen jasyl alańǵa shyǵady.
Al 28 naýryzda Namıbııa men Komor araldary oınaıdy.
Joba - álemniń ártúrli qurlyqtaryndaǵy quramalardy bir alańǵa jınap, ózara tájirıbe almasýǵa múmkindik beretin halyqaralyq jarys. Týrnırdiń basty ereksheligi – komandalardyń basqa konfederatsııa ókilderimen oınaýyna jaǵdaı jasaý.
FIFA Series alǵash ret 2024 jyly pılottyq formatta uıymdastyryldy. Sol tájirıbeden keıin joba tolyqqandy halyqaralyq týrnır retinde damytylyp, 2026 jyldan bastap keńeıtilgen formatta ótedi.
Basty jańalyq - endi bul týrnırge erler quramalarymen qatar áıelder ulttyq komandalary da qatysady.
Týrnırdiń negizgi maqsaty – ulttyq quramalardyń oıyn tájirıbesin arttyryp, ártúrli fýtbol mektepteriniń bir-birimen básekege túsýine múmkindik berý. FIFA Series aıasynda ár topqa túrli qurlyqtan tórt komandadan bólinedi. Árbir qurama eki match ótkizedi. Bul halyqaralyq kúntizbege artyq júkteme túsirmeı, sonymen birge sapaly oıyn tájirıbesin qamtamasyz etýge baǵyttalǵan.
Bıylǵy týrnır matchtary birneshe elde ótedi. Olardyń qatarynda Qazaqstan da bar. Sonymen birge Aýstralııa, Ázerbaıjan, Indonezııa, Qazaqstan, Jańa Zelandııa, Pýerto-Rıko, Rýanda jáne Ózbekstan qabyldaýshy elder retinde tańdaldy.
Toptardyń bólinisi tómendegishe:
Aýstralııa: Kamerýn, Qytaı, Kıýrasao, Aýstralııa
Ázerbaıjan: Oman, Sent-Lıýsııa, Serra-Leone, Ázerbaıjan
Indonezııa: Bolgarııa, Sent-Kıts jáne Nevıs, Solomon araldary, Indonezııa
Qazaqstan: Namıbııa, Komor araldary, Qazaqstan
Jańa Zelandııa: Kabo-Verde, Chılı, Fınlıandııa, Jańa Zelandııa
Pýerto-Rıko: Amerıkan Samoasy, Gýam, Vırgın araldary, Pýerto-Rıko
Rýanda: Estonııa, Grenada, Kenııa, Rýanda
Rýanda V: Arýba, Lıhtenshteın, Makao, Tanzanııa
Ózbekstan: Gabon, Trınıdad jáne Tobago, Venesýela, Ózbekstan;
Oqý-jattyǵý jıyny Qazaqstan Premer-lıgasynyń úshinshi týrynan keıin Astanada bastalady.
Elimizdiń ulttyq quramasynyń bas bapkeri Talǵat Baısýfınov keńeıtilgen tizimge 50 oıynshyny engizdi.