FIFA Series-2026: Qazaqstan quramasy Namıbııadan basym tústi

ASTANA. KAZINFORM - Fýtboldan Qazaqstan ulttyq quramasynyń Astanada ótip jatqan FIFA Series-2026 týrnırindegi alǵashqy oıynynda Namıbııamen kezdesti.

Alǵashqy mınýttan qarsylastar jyldam gol soǵý múmkindigin izdegen edi. Degenmen dittegen maqsatyna jete alǵan joq. Oıynnyń 12-mınýtynda qazaqstandyq Ivan Svırıdov qarsylastar qaqpasynan sańylaý tapty. Odan keıin qos quramanyń da esepti ózgertetin birneshe múmkindigi bolǵan edi.

Ekinshi kezeńde Qazaqstan quramasynyń bas bapkeri Talǵat Baısýfınov qaqpashy Temirlan Anarbekovtiń ornyna Muhammedjan Seısendi shyǵarsa, Ramazan Orazovty Aıbol Ábiken almastyrdy.

Kezdesý barysynda qos quramanyń da belsendiligi baıqaldy. Oıynnyń 79-mınýtynda qazaqstandyq Álibek Qasym esepti ústemeleı tústi.

Osylaısha Qazaqstan quramasy qarsylasynan 2:0 esebimen basym tústi.

Namıbııa quramasy osal qarsylas emes. Ulttyq quramalar arasyndaǵy FIFA reıtınginde 118-orynda turǵan olar alǵashqy resmı kezdesýinde 1990 jyly Mavrıkııden 1:2 esebimen jeńilgen edi.

Namıbııalyq fýtbolshylar Afrıka Ulttar kýbogynyń fınaldyq kezeńine tórt ret qatysqan (1998, 2008, 2019 jáne 2023 jyldary) edi. Eń úzdik nátıjesi — 2023 jyly 1/8 fınalǵa shyǵýy.

Bul týrnırde alǵashqyda Qazaqstan, Namıbııa, Komor araldary jáne Kýveıt qatysady dep josparlanǵan edi. Degenmen Kýveıttiń bas tartýyna baılanysty oıyndardy aınalmaly júıe boıynsha ótkizýge sheshim qabyldandy.

Endi qazaqstandyq fýtbolshylar 31 naýryzda Komor araldarymen jasyl alańǵa shyǵady.

Al 28 naýryzda Namıbııa men Komor araldary jasyl alańǵa shyǵady.

Týrnırdiń negizgi maqsaty – ulttyq quramalardyń oıyn tájirıbesin arttyryp, ártúrli fýtbol mektepteriniń bir-birimen básekege túsýine múmkindik berý.

FIFA Series aıasynda ár topqa túrli qurlyqtan tórt komandadan bólinedi. Árbir qurama eki match ótkizedi. Bul halyqaralyq kúntizbege artyq júkteme túsirmeı, sonymen birge sapaly oıyn tájirıbesin qamtamasyz etýge baǵyttalǵan.