FIFA reıtınginde Qazaqstan quramasy bes saty tómen tústi
ASTANA. QazAqparat - Búgin FIFA-nyń fýtboldan búkilálemdik ulttyq quramalar reıtıngi jańardy. Onda Qazaqstan ulttyq quramasy 127-shi orynnan 132-orynǵa syrǵyp, 5 saty tómen túsken.
Ótken aıda ulttyq quramamyz 127-orynda turǵan bolǵan. Alaıda odan beri 2016 jylǵy Eýropa chempıonatynyń irikteý syny aıasynda Qazaqstan quramasy eki oıyn ótkizip, Nıderlandy jáne Chehııa quramasyna jol bergeni sebepti tablodaǵy orny tómendegen.
Jańa kesteniń tórinen 1669 upaımen Germanııa quramasy oryn alsa, 1565 upaıy bar Argentına quramasy ekinshi orynda. Al Kolýmbııa 1420 upaımen úzdik úshtikti túıindep tur. Úzdik úsheý aldyńǵy aıdaǵy oryndaryn saqtap qalǵan, al bul joly ótken aıda 4-orynda turǵan Belgııa men 5-orynda turǵan Nıderlandy ózara oryn aýystyrypty. Al álemniń basqa elderiniń quramalary qaı orynǵa oıysqanyn www.championat.com saıtynan tolyǵyraq bilýge bolady.
