FIFA reıtıngi: Qazaqstan quramasy 137-inshi orynǵa syrǵydy
ASTANA. Qazannyń 21-i. QazAqparat /Marlan Jıembaı/ - Halyqaralyq fýtbol federatsııasy (FIFA) ulttyq quramalardyń kezekti reıtıngin jarııalady. Ol boıynsha Qazaqstan quramasy Gonkong komandasymen birge 137-138-inshi oryndardy bólisip tur. Osylaısha bizdiń komanda budan bir aı burynǵy kórsetkishinen on bir satyǵa tómendep ketti.
Qazaqstan Fýtbol federatsııasynyń málimetinshe, «Eýro-2012» chempıonatynyń irikteý týrnırinde Qazaqstan quramasymen birge «A» tobynda synǵa túsip jatqan Germanııa quramasy reıtıng boıynsha 4-shi, Túrkııa 29-shy, Avstrııa 49-shy, Belgııa 62-shi, al Ázirbaıjan 91-shi oryndarda tur.
Aıta keteıik, FIFA-nyń bul reıtıngi jarııalanǵanǵa deıin Qazaqstan quramasy «Eýro-2012» chempıonatynyń irikteý týrnıri aıasynda tórt match ótkizip, sonyń barlyǵynda jeńilip qaldy. Bizdiń komanda óz alańynda Túrkııaǵa 0:3, Belgııaǵa 0:2, Germanııaǵa 0:3 esebimen ese jiberse, syrt alańda Avstrııadan 0:2 esebimen jeńildi. Osydan keıin QFF Qazaqstan quramasynyń bas jattyqtyrýshysy nemis mamany Bernd Shtorkpen kelisimshartty merziminen buryn toqtatty. Aıta keteıik, bapkermen kelisimshart aǵymdaǵy jyldyń sońyna deıin jasalǵan bolatyn. Al aradaǵy ýaǵdalastyq boıynsha bizdiń komanda tórt oıynnan kem degende 3 upaı jınaýy kerek edi.
FIFA-nyń jańa reıtıngi boıynsha úzdik ondyqqa myna komandalar kirdi: 1. Ispanııa, 2. Gollandııa, 3. Brazılııa, 4. Germanııa, 5 Argentına. 6. Anglııa, 7. Ýrýgvaı, 8. Portýgalııa, 9. Horvatııa, 10. Reseı. Kezekti reıtıng 2010 jylǵy qarashanyń 17-sinde jarııalanady.
