FIFA: Reseı men Katarda ÁCh ótpeýi múmkin
ASTANA.QazAqparat - FIFA-nyń aýdıt jáne zańdylyqtyń saqtalýy jónindegi komıssııa tóraǵasy Domenıko Skala 2018 jyly Reseıde, 2022 jyly Katar elinde Álem chempıonatyn ótkizý sheshimi joıylýy múmkin ekenin joqqa shyǵarmady, dep habarlaıdy «VVS» agenttigi.
«Eger daýys jınaý kezinde para berilgeni anyqtalsa, onda daýys berý qorytyndysy joqqa shyǵarylady da jaramsyz bolyp tanylady», dedi ol «Sonntags Zeitung» shveıtsarııalyq basylymyna bergen suhbatynda.
«Biraq, dál qazirgi ýaqytta ondaı kúmánǵa dálel tabylǵan joq», - dedi ol. Aıta ketý kerek, AQSh jáne Shveıtsarııa úkimeti Reseı men Katar elderine ÁCh ótkizý quqyǵyn taǵaıyndaǵan daýys berý sheshimderine tergeý jumystaryn júrgizip jatyr.
