FIFA prezıdenti jankúıerleri rasızmge jol bergen komandany jeńildi dep sanaýǵa shaqyrdy

ASTANA. KAZINFORM - Halyqaralyq fýtbol federatsııasynyń (FIFA) prezıdenti Djannı Infantıno jankúıerleri trıbýnada qarsylastaryna násilshildik sózder aıtqan komandalarǵa avtomatty túrde tehnıkalyq jeńilis berýge shaqyrdy, dep habarlaıdy VVS. 

Infantıno senbi kúni ıtalııalyq «Ýdıneze» jáne «Mılan», aǵylshynnyń «Sheffıld Ýensdeı» jáne «Koventrı Sıtı» klýbtary arasyndaǵy matchtarda bolǵan «óte jıirkenishti» oqıǵalardan keıin osyndaı málimdeme jasady.

Infantıno X áleýmettik jelisinde «jankúıerleri násilshildik qorlaýdy qoldanatyn komandalardy avtomatty túrde utyldy dep esepteýdi, sondaı-aq mundaı komandalarǵa búkil álem boıynsha stadıondarda oınaýǵa tyıym salýdy» qajet dep sanaıtynyn jazdy.

«FIFA men fýtbol násilshildik pen kemsitýshiliktiń kez kelgen túri qurbandarymen nıettestigin bildiredi. Násilshildikke jol joq! Kez kelgen kemsitýshilikke jol joq! Senbi kúni Ýdın men Sheffıldtegi oryn alǵan oqıǵalar múldem jıirkenishti jáne múldem qabyldanbaıdy. Jábirlengen oıynshylarǵa meniń qoldaýym sheksiz», — dep jazdy FIFA basshysy.

Italıan klýbtary arasyndaǵy matchta «Mılan» jeńiske jetti.

Bul oıyn kezinde «Ýdıneze» jankúıerleri «Mılan» qaqpashysy, frantsýz Gvıanasynyń týmasy Maık Meınıanǵa násilshildik sózder aıqaılaı bastaǵannan keıin qysqa ýaqytqa toqtatylǵan edi.

Match shamamen 10 mınýttan keıin qaıta jalǵasty.

Sky Italia telearnasyna bergen suhbatynda Menıan «jaı aıtqanmen nátıje shyqpaıtyndyqtan» qatań sanktsııa qoldanǵan durys dep sanaıtynyn aıtty.

«Biz olarǵa bulaı isteýge bolmaıtynyn kórsetýimiz kerek. Bul barlyq jankúıerlerge qatysty emes, kópshiligi óz komandasyn qoldap, qarsylas komandaǵa aıdap salady, bul — qalypty jaǵdaı. Biraq násilshildikke jol berilmeýi tıis», — dedi ol.