FIFA prezıdenti laýazymyna úsh úmitker usynyldy

ASTANA. KAZINFORM – Halyqaralyq fýtbol federatsııasy (FIFA) 2027 jyly ótetin aldaǵy saılaýda uıym prezıdenti laýazymyna úsh úmitkerdiń esimin resmı túrde jarııalady.
FIFA-nyń resmı saıtynda ótinimderdi qabyldaý merzimi aıaqtalǵannan keıin uıymǵa ulttyq fýtbol qaýymdastyqtary usynǵan úsh kandıdatýra kelip túskeni kórsetilgen. Olar FIFA -nyń qazirgi prezıdenti Djannı Infantıno, Frantsııa fýtbol federatsııasynyń basshysy Fılıpp Dıallo jáne Japonııa fýtbol qaýymdastyǵynyń qurmetti prezıdenti Kodzo Tasıma.

FIFA prezıdenti laýazymyna úsh úmitker usynyldy
Foto: france24.com

Dıallo UEFA atqarý komıteti men FIFA keńesinde usynylǵan eýropalyq fýtbol qaýymdastyqtarynyń qoldaýyna ıe boldy. Sheshim 16 qarashada UEFA basshysy Aleksander Cheferınniń tóraǵalyǵymen ótken otyrysta biraýyzdan qabyldandy. Japon fýtbol qaýymdastyǵy óz kezeginde Tasımanyń kandıdatýrasyn 17 qarashada resmı túrde usyndy.

FIFA reglamentine sáıkes, úsh ótinim de tekserý júrgizip, kandıdattardy jiberý týraly sheshim qabyldaıtyn saılaý komıssııasyna beriledi. Saılaýǵa qatysýshylardyń túpkilikti tizimi ulttyq qaýymdastyqtarǵa 2027 jylǵy 18 aqpannan keshiktirilmeı jetkizilýi tıis.
FIFA-nyń jańa prezıdentin saılaý 2027 jylǵy 18 naýryzda Rabatta (Marokko) ótetin uıymnyń 77-shi Kongresi aıasynda ótedi.

Djannı Infantıno álemdik fýtboldy 2016 jylǵy aqpannan beri basqaryp keledi. 2023 jyly ol kezekti merzimge qarsylassyz qaıta saılanǵan edi. Endi oǵan basqa úmitkerlermen saılaýǵa qatysýǵa týra keldi.

Eske salsaq, fýtboldan Qazaqstan quramasy 2028 jylǵy Eýropa chempıonatynyń irikteý týrnıriniń jerebe tartý rásimi aldynda qaı sebetke ornalasqany belgili boldy.