FIFA prezıdenti Djannı Infantıno qaıta saılaýǵa túsedi
ASTANA. KAZINFORM – FIFA prezıdenti Djannı Infantıno kelesi jyly uıym basshysy qyzmetine qaıta saılaný úshin kandıdatýrasyn usynbaq. FIFA basshysynyń kezekti saılaýy 2027 jylǵy 18 naýryzda Marokkonyń Rabat qalasynda ótetin uıymnyń 77-kongresi aıasynda ótedi, dep habarlaıdy Euronews.
FIFA buǵan qatysty málimdemesinde Infantınonyń 2027 jyly qaıta saılanýǵa nıetti ekenin sáýir aıynda jarııalaǵanyn jáne onyń josparynda eshqandaı ózgeris bolmaǵanyn habarlady.
Djannı Infantıno FIFA prezıdenti qyzmetine alǵash ret 2016 jyly saılanǵan. Bıyl shilde aıynyń sońynda FIFA-nyń jekemenshik ınvestıtsııa tartýǵa baǵyttalǵan daýly josparyn usynýy onyń uıym basshysy retindegi jaǵdaıyna qysym kúsheıtti. Keıin bul jospar toqtatyldy. Joba boıynsha syrtqy ınvestorlarǵa FIFA Forward Enterprise (FFE) dep atalatyn kommertsııalyq enshiles qurylymnan úles satyp alýǵa múmkindik berý kózdelgen.
Bul bastama fýtbol qaýymdastyǵynda úlken qarsylyq týǵyzyp, keıbir taraptar FIFA-ny sportty «satýǵa» tyrysyp jatyr dep aıyptady. Sonyń saldarynan Infantınonyń uıym basshylyǵynda qalýyna qatysty fýtbol áleminde eleýli pikir qaıshylyǵy paıda boldy. Aımaqtyq konfederatsııalar men jekelegen elder bul máselede ekige bólindi.
Tamyz aıynda UEFA FIFA-nyń FFE jospary «qaıtarymsyz jáne túpkilikti túrde toqtatylǵanyna» jáne onyń basqa nusqada, formatta nemese ataýmen qaıta usynylmaıtynyna kepildik alǵanyn málimdegennen keıin Eýropa elderi FIFA týrnırlerine boıkot jarııalaý qaýpinen bas tartty. Alaıda UEFA Infantınonyń qyzmetten ketýin talap etýdi jalǵastyryp otyr.
FIFA prezıdentiniń kezekti saılaýy 2027 jylǵy 18 naýryzda Marokkonyń Rabat qalasynda ótetin uıymnyń 77-kongresinde uıymdastyrylady.
Infantıno bıyl Kanadada ótken FIFA-nyń 76-kongresinde uıym prezıdenti qyzmetine qaıta saılanýǵa nıetti ekenin rastaǵan. Ol uıymǵa múshe 211 qaýymdastyq ókili aldynda kelesi jyly prezıdent saılaýyna kandıdat bolatynyn málimdegen.
Keıin FIFA keńesi halyqaralyq týrnırlerdi ishinara jekeshelendirý josparyna baılanysty synǵa ushyraǵan Infantınony qoldaıtynyn bildirdi. Uıymnyń habarlaýynsha, FIFA-nyń bas hatshysy Mattıas Grafstrem men keńes músheleri Infantınoǵa degen senimin rastaǵan.
Sondaı-aq Infantınonyń josparyn synaǵan FIFA basshylarynyń biri qyzmetinen ketkenin jazdyq.
