FIFA Qytaıǵa ÁCh-2026 translıatsııa quqyǵyn $60 mln-ǵa satty
ASTANA. KAZINFORM – Halyqaralyq fýtbol federatsııasy (FIFA) Qytaıda 2026 jylǵy fýtboldan álem chempıonatyn kórsetý quqyǵy boıynsha kelisim jasasty, dep habarlaıdy Kazinform.
Kelisim China Media Group medıakorporatsııasymen jasalǵan.
Sharttyń quny shamamen 60 mln dollardy quraıdy. Bul soma FIFA kútken bastapqy kórsetkishten aıtarlyqtaı tómen bolǵan.
Málimetke sáıkes, uıym Qytaıdaǵy translıatsııa quqyqtary úshin shamamen 300 mln dollar alýdy josparlaǵan.
Kelisim 2031 jylǵa deıingi tórt álem chempıonatyn qamtıdy. Onyń ishinde eki erler jáne eki áıelder týrnıri bar.
Atap aıtqanda, kelisimge 2026 jylǵy fýtboldan álem chempıonaty da engizilgen. Týrnır AQSh, Kanada jáne Meksıkada ótedi.
Álem chempıonatyna 48 qurama qatysyp, jalpy 104 match uıymdastyrylady.
Qytaı quramasy týrnırge qatyspaıtynyna qaramastan, elde fýtbol translıatsııalaryna qyzyǵýshylyq joǵary kúıinde qalyp otyr.
Sarapshylar muny fýtboldyń tanymaldyǵy men týrnırdiń kommertsııalyq áleýetimen baılanystyrady.
Aıta keteıik, FIFA 2026 jylǵy álem chempıonaty qatysýshylaryna beriletin júlde qoryn arttyrady.
