FIFA Qazaqstanda fýtboldyń damýyn qoldaýǵa daıyn
NUR-SULTAN. QazAqparat – Qazaqstan fýtbol federatsııasynyń basshysy Ádilet Barmenqulov Parıj qalasyndaǵy eýropalyq keńsesinde FIFA Prezıdenti Djannı Infantınomen kezdesip, elimizdegi buqaralyq fýtboldy damytý jobasyn usyndy, dep habarlaıdy QazAqparat Federatsııanyń baspasóz qyzmetine silteme jasap.
«Búgin FIFA basshysymen mańyzdy kezdesý ótti. Kún tártibinde eki negizgi másele kóterildi. Balalar-jasóspirimder jáne buqaralyq fýtboldy damytý. Bizdiń maqsatymyz – ár qazaqstandyq úshin buqaralyq fýtboldyń qoljetimdi bolýy, áýesqoı fýtbolshylardyń sanyn ulǵaıtý jáne elimizde fýtboldy damytý úshin qolaıly jaǵdaı jasaý. Bizdiń bastamalarymyzdy qoldap, usynylǵan jobalarymyzdyń bolashaǵyna baǵa bergeni úshin Djannı Infantınoǵa alǵysymyzdy bildiremiz», - deıdi QFF Prezıdenti Ádilet Barmenqulov.
Buqaralyq fýtboldy damytý jobasynda sport túrin nasıhattaý, daıyndyq jáne jarys júıeleri, sonymen qatar fýtbol ınfraqurylymyn jaqsartý máseleleri de qamtylǵan.
Prezıdent Djannı Infantıno sol jobalardy júzege asyrý úshin Qazaqstan fýtbol federatsııasyna jan-jaqty qoldaý kórsetýge daıyn ekenin atap ótti. Sonymen qatar, qazaqstandyq fýtbol mamandaryna arnalǵan bilim berý protsesin uıymdastyrýda FIFA-nyń tehnıkalyq komandasy kómek kórsetetinin jetkizdi.
Taraptar FIFA men QFF yntymaqtastyǵy aıasynda Qazaqstan aýmaǵynda FIFA is-sharalaryn ótkizý, sonymen qatar Ortalyq Azııa fýtbol qaýymdastyqtarynyń ózara qarym-qatynasyn jaqsartý máselelerin talqylady. Olardy ári qaraı talqylaý maqsatynda FIFA basshysy Djannı Infantıno Qazaqstanǵa kelmek.
Foto: kff.kz
