FIFA Qazaqstanda balalar fýtbolyn damytýǵa 250 000 AQSh dollar bóledi
ASTANA.KAZINFORM - FIFA Qazaqstan fýtbol federatsııasynyń 2026 jylǵa arnalǵan FIFA Talent Development Scheme baǵdarlamasy aıasyndaǵy jobalyq ótinimin resmı túrde maquldady.
Balalar-jasóspirimder fýtbolyn damytýǵa jáne mamandardy daıarlaýǵa baǵyttalǵan negizgi bastamalardy júzege asyrý úshin FIFA 250 000 AQSh dollary kóleminde qarjy bóldi.
Bólingen grant fýtboldy damytýdyń negizgi baǵyttaryna jumsalady. Onyń ishinde 125 000 dollar áleýeti joǵary jas oıynshylardy izdeý jáne irikteýge baǵyttalǵan «Bolashaq chempıondar» aýqymdy jobasyna bólinedi. Bapkerler men skaýttarǵa arnalǵan oqytý semınarlaryn uıymdastyrýǵa 50 000 dollar qarastyrylǵan. Taǵy 50 000 dollar baǵdarlamany basqarýǵa baılanysty operatsııalyq shyǵyndardy (FIFA Operations Project) jabýǵa baǵyttalady. Sonymen qatar 25 000 dollar balalardy qorǵaý standarttaryn engizýge jáne baǵdarlama qatysýshylaryna psıhologııalyq qoldaý kórsetýge jumsalady.
Arsen Venger basqaratyn FIFA-nyń fýtboldy jahandyq damytý jónindegi toby Qazaqstandaǵy fýtbol rezervin daıarlaý sapasyn arttyrýǵa baǵyttalǵan QFF jobalarynyń joǵary deńgeıde ázirlengenin atap ótti.
FIFA Talent Development Scheme baǵdarlamasy ulttyq qaýymdastyqtarǵa búkil álem boıynsha jas fýtbol talanttaryn izdeý, damytý jáne qoldaý baǵyttarynda jan-jaqty kómek kórsetý maqsatynda qurylǵan.
Eske salsaq, budan buryn Eýropa lıgasynda «Qaırat» alǵashqy kezdesýde «Anderlehtke» ese jiberdi.
