FIFA Qatardaǵy álem chempıonaty kezinde stadıondarda syra satylýyna tyıym saldy

ASTANA. QazAqparat – Halyqaralyq fýtbol federatsııasy Qatarda ótetin álem chempıonaty kezinde stadıondarda syra satylýyna tyıym salynatynyn resmı málimdedi. Chempıonat 2 kúnnen keıin, 20 qarashada bastalady, dep habarlaıdy QazAqparat FIFA saıtyna silteme jasap.

«Qabyldaýshy tarap bıligi men FIFA arasyndaǵy kelissózderden keıin Qatardaǵy ÁCh-2022 stadıondarynyń perımetrlerinen syra satý núktelerin alyp tastap, alkogoldi ishimdikterdi jankúıerlerdiń ózge demalys oryndary men lıtsenzııalanǵan mekemelerde shoǵyrlandyrý týraly sheshim qabyldandy.

Bul Bud Zero (alkogolsiz syra) satylymyna yqpal etpeıdi, ol Qatardaǵy Álem kýboginiń barlyq stadıondarynda qoljetimdi bolady.

Uıymdastyrýshy el bıligi men FIFA stadıondar men olarǵa irgeles aýmaqtardyń barlyq jankúıerlerge jaǵymdy ári jaıly áser qaldyraýyn budan ári qaraı da baqylaýda ustaıdy.

Týrnırdi uıymdastyrýshylar AB InBev tarapynan bildirilgen túsinistik pen Qatardaǵy FIFA 2022™️ fýtboldan álem chempıonaty kezinde barshany qanaǵattandyrýǵa degen ortaq umtylysymyzǵa qoldaý bildirgenin baǵalaıdy», - delingen Halyqaralyq fýtbol federatsııasynyń málimdemesinde.

Aıta ketsek, stadıondarda syranyń satylýyna tyıym salýdy Qatar sheıhynyń áýleti talap etken.

Buǵan deıin habarlanǵanyndaı, 20 qarasha men 18 jeltoqsan aralyǵynda Qatarda fýtboldan álem chempıonaty ótedi. Qazaqstandyqtar barlyq matchtardy tikeleı efırden kóre alady.

Foto: fifa.com