FIFA Katarda ótetin álem chempıonatynyń ashylýyn 20 qarashaǵa jyljytty
«Bul ózgeris fýtboldan álem chempıonatynyń qojaıyndar nemese qazirgi chempıondar qatysatyn birinshi matchpen ashylýy dástúriniń sabaqtastyǵyna múmkindik beredi», - delingen FIFA málimdemesinde.
Demek, chempıonat qojaıyndary Katar men Ekvador arasyndaǵy alǵashqy oıyndy ashylý saltanatynan keıin birden ótkizedi.
«FIFA-2022 álem chempıonaty jergilikti jáne sheteldik jankúıerler úshin tipten merekelik sıpatta bastalatyn boldy, óıtkeni qabyldaýshy el Katar endi Ekvadormen jeksenbi, 20 qarasha kúni saǵat 19:00-de (Nur-Sultan ýaqytymen 22:00) kezdesedi. Bılet ıelerine matchtardyń aýystyrylǵany týraly elektrondyq poshta arqyly habarlanady jáne olardyń bıletteri jańa kún/ýaqytqa qaramastan jaramdy bolyp qalady. Sonymen qatar, FIFA osy ózgeristen týyndaıtyn kez kelgen máselelerdi sheshýge tyrysady», - dep málim etti FIFA.
Halyqaralyq fýtbol federatsııasy bul sheshimniń «básekege qabiletti jáne operatsııalyq saldarlardy» baǵalaýdan keıin, múddeli taraptarmen, sondaı-aq qabyldaýshy elmen keńese otyryp qabyldanǵanyn aıtty.
Buǵan deıin chempıonattyń birinshi matchy 21 qarashada Senegal men Nıderland arasynda ótedi dep josparlanǵan. FIFA sheshiminen keıin bul match 21 qarasha saǵat 19:00-ge aýystyryldy, ıaǵnı Katar men Ekvador arasyndaǵy oıynǵa bólingen keshki ýaqytqa aýysty.
Aıta keteıik, bıyl fýtboldan 22-shi álem chempıonaty 20 qarasha men 18 jeltoqsan aralyǵynda Katarda ótedi. Ashylý saltanaty men birinshi oıyndy jankúıerler Katar astanasy Dohanyń soltústiginde ornalasqan ál-Hor qalasyndaǵy 60 myń kórermenge arnalǵan «ál-Baıt» stadıonynda tamashalaıdy. Chempıonat arab elinde alǵash ret ótkizilip otyr. Sondaı-aq, týrnırdiń 92 jyldyq tarıhynda tuńǵysh ret jyldyń sońǵy aılary – qarasha men jeltoqsanda ótkizilmek. Týrnırdiń fınaly 18 jeltoqsanda, Katardyń ulttyq kúnine belgilengen.
Foto: AlJazeera
