FIFA Irannyń ChM-2026 týrnırine qatysatynyn rastady: buǵan Tramp ne dedi
ASTANA. KAZINFORM – FIFA Iran quramasynyń 2026 jylǵy álem chempıonatyna qatysatynyn rastady, dep habarlaıdy DW.
AQSh prezıdenti Donald Tramp Irannyń AQSh, Kanada jáne Meksıkada ótetin fýtboldan álem chempıonatyna qatysýyna qarsy emes ekenin málimdedi. Onyń aıtýynsha, bul másele kóbine FIFA prezıdenti Djannı Infantınoniń sheshimine baılanysty.
– Eger Djannı solaı dese – men qarsy emespin. Qatysa bersin, – dedi Tramp, fýtbol saıasattan tys bolýy tıis ekenin atap ótip.
Málimdeme Vankýverde ótken FIFA-nyń jyl saıynǵy kongresi aıasyndaǵy jaǵdaıdan keıin jasaldy. Onda Iran jalǵyz qatyspaǵan el boldy. Bul eldiń delegatsııasy, federatsııa prezıdenti Mehdı Tadj bastaǵan top, Kanadaǵa kire almady – buǵan deıin berilgen ruqsattar keri qaıtarylǵan.
Kanada bıliginiń málimetinshe, sheshim Tadjdyń Islam revolıýtsııasy saqshylary korpýsymen yqtımal baılanysyna baılanysty bolýy múmkin. Bul uıym Kanadada terrorıstik uıym retinde tanylǵan. Premer-mınıstr Mark Karnı mundaı baılanysy bar tulǵalarǵa elge kirýge tyıym salynatynyn aıtty. Al Syrtqy ister mınıstri Anıta Anand ruqsattardyń qaıtarylǵanyn rastady.
Soǵan qaramastan, Infantıno Irannyń ÁCh-2026 týrnırine qatysatynyn málimdedi. Onyń aıtýynsha, bul týrnır halyqaralyq kelispeýshilikterge qaramastan elderdi biriktirýi tıis.
Josparǵa sáıkes, Iran quramasy toptyq kezeńde Jańa Zelandııa, Belgııa jáne Mysyr komandalaryna qarsy oınaıdy. Matchtar 2026 jyldyń maýsym aıynda Los-Andjeles pen Sıetl qalalarynda ótedi.
Sondaı-aq Infantıno 2027 jyly ótetin FIFA prezıdenti saılaýyna qaıta túsýge nıetti ekenin habarlady. Jeńiske jetken jaǵdaıda ol 2031 jylǵa deıin qyzmetinde qala alady.
Aıta keteıik, buǵan deıin FIFA ÁCh-2026 týrnıriniń júlde qoryn rekordtyq 871 mln dollarǵa deıin ulǵaıtqanyn jazdyq.
