FIFA Infantınoǵa qatysty jańa aıyptaýlardy joqqa shyǵardy
ASTANA. KAZINFORM – Halyqaralyq fýtbol federatsııasy (FIFA) uıym prezıdenti Djannı Infantınonyń bedeline nuqsan keltirýge baǵyttalǵan «kelisilgen jáne jalǵasyp jatqan áreketter» bar ekenin málimdedi, dep habarlaıdy DW.
FIFA 8 tamyzda málimdeme jarııalap, halyqaralyq týrnırlerdi ishinara jekeshelendirý josparyna baılanysty týyndaǵan daý aıasynda Infantınoǵa taǵylǵan aıyptardy negizsiz dep atady. Qazirgi ýaqytta atalǵan jospar keıinge qaldyrylǵan.
– FIFA-ǵa múshe qaýymdastyqtardyń qoldaýyna ıe bolmaǵandar uıymnyń belgilengen demokratııalyq úderisteri arqyly qol jetkize almaǵan maqsatyna aıyptaý, tuspaldaý nemese jalǵan aqparat taratý arqyly jetýge tyryspaýy tıis, – delingen FIFA-nyń X áleýmettik jelisinde jarııalaǵan málimdemesinde.
Uıymnyń málimetinshe, osy taqyryptaǵy sońǵy jarııalanymdarda FIFA men onyń prezıdentine qatysty rastalmaǵan aıyptaýlar men shyndyqqa janaspaıtyn málimdemeler bolǵan.
Buǵan deıin brıtandyq The Telegraph gazeti Infantıno UEFA qyzmetkerleriniń biriniń laýazymynyń ósýine yqpal etý úshin óz bedelin paıdalanǵan dep jazdy. Basylymnyń málimetinshe, Infantıno atalǵan qyzmetkermen jaqyn qarym-qatynasta bolǵan.
The Telegraph derekkózderin jarııalamaǵan. Basylym qyzmetker jumystan ketken kezde ótemaqy retinde «alty tańbaly soma» alǵanyn, sondaı-aq jylyna shamamen 45 myń fýnt sterlıng nemese 53 myń eýro turatyn MBA baǵdarlamasyndaǵy oqý aqysy tólengenin habarlady.
Buǵan deıin FIFA basshylyǵy halyqaralyq týrnırlerdi ishinara jekeshelendirý josparyna baılanysty synǵa ushyraǵan Djannı Infantınoǵa qoldaý bildirgen. 5 tamyzda Rabatta ótken shuǵyl otyrysta onyń FIFA prezıdenti qyzmetinde qalatyny týraly sheshim qabyldandy.
Aıta keteıik, Eýropa Infantınony FIFA prezıdenttigine qaıta saılaýǵa qarsy ekeni habarlanǵan.
