FIFA fýtboldy damytýǵa 6,35 mlrd dollar bólýdi josparlap otyr
ASTANA.KAZINFORM — Halyqaralyq fýtbol federatsııasy (FIFA) fýtboldy damytýǵa bólinetin qarjyny arttyryp, aldaǵy tórt jyldyq kezeńde ulttyq qaýymdastyqtardyń árqaısysyna 25 mln dollardan berýdi kózdep otyr. Baǵdarlamanyń jalpy bıýdjeti 6,35 mlrd dollarǵa jetýi múmkin, dep habarlaıdy AP.
Usynysqa sáıkes, FIFA-ǵa múshe 211 ulttyq qaýymdastyqtyń árqaısysyna 4 jyl ishinde bólinetin qarjy kólemi bastapqy jospardaǵy 10 mln dollardan 25 mln dollarǵa deıin ulǵaıady.
FIFA prezıdenti Djannı Infantıno alty qurlyqtyq fýtbol konfederatsııasynyń basshylaryna hat joldaǵan. Uıymnyń keńesi baǵdarlamanyń túpkilikti nusqasyn jeltoqsan aıynda ázirleýdi josparlap otyr. Al ony naýryzda ótetin FIFA kongresinde bekitýi múmkin.
Federatsııa álem chempıonatynan túsetin tabystyń bir bóligin ulttyq qaýymdastyqtar men qurlyqtyq konfederatsııalarda fýtboldy damytýǵa baǵyttamaq. Qarjynyń 3,5 mlrd dollardan astamyn FIFA rezervinen bólý kózdelgen. Bul qor 2026 jylǵy álem chempıonatynda 48 ulttyq qurama baq synaıtynyna baılanysty kútilip otyrǵan qarjylyq tabystyń arqasynda ulǵaıǵan.
FIFA-nyń boljamynsha, 2022–2026 jyldardy qamtıtyn tórt jyldyq kezeńdegi jalpy tabys shamamen 15 mlrd dollarǵa jetedi. Bul kezeńge AQSh, Kanada jáne Meksıkada ótetin álem chempıonaty da kiredi. Tabys kólemi uıymnyń burynǵy boljamdarynan edáýir joǵary.
Ázirge usynys resmı túrde bekitilgen joq. Qarjynyń naqty kólemi men ony bólý tártibin uıymnyń basshylyǵy sheshedi.
Buǵan deıin FIFA Qazaqstanda balalar fýtbolyn damytýǵa 250 000 dollar bóletini týraly jazǵan bolatynbyz.
Aıta keteıik, Mońǵolııada FIFA qoldaýymen jańa stadıon salynbaq.
