FIFA Brazılııadaǵy álem chempıonatynan 4,5 mlrd. dollar paıda túsedi dep kútýde
ASTANA. QazAqparat - Halyqaralyq fýtbol federatsııasy qaýymdastyǵynyń (FIFA) bas hatshysy Jerom Valke uıymnyń Brazılııadaǵy álem chempıonatyn ótkizýden túsetin paıda 4,5 mlrd. dollardy quraıdy dep habarlady. Bul týraly ol týrnırdiń ashylý oıyny ótetin San-Paýlýdaǵy baspasóz máslıhatynda aıtty, dep jazady RBK.
«Chempıonatttan túsetin paıda shamamen 4,5 mlrd. dollardy quraıdy dep kútýdemiz», - dedi Valke. Aıta keteıik, týrnırdi uıymdastyrýǵa FIFA 2 mlrd. dollardan astam qarjy jumsaǵan eken. Osyǵan deıin FIFA prezıdenti Iozef Blatter Brazılııa sharany ótkizýge daıyn ekenin aıtqan edi. Valkeniń pikiri de osyndaı, dep jazdy Globo agenttigi. «12 maýsymdaǵy týrnırdiń bastalýyna bári daıyn. Quramalardyń daıyndalýy úshin barlyq jaǵdaı jasaldy. Jarystyń alǵashqy aptalarynda qıynyraq, biraq biz esh másele týyndamaıtynyna senimdimiz. Barlyǵy bizdiń qatań baqylaýymyzda», - dedi ol. Esterińizge sala keteıik, Brazılııada 12 maýsym men 13 shilde aralyǵynda fýtboldan jıyrmasynshy álem chempıonaty ótedi. Bul elde týrnır 2-shi ret uıymdastyrylmaq. Brazılııa alǵash ret álem birinshiligin 1950 jyly qabyldaǵan bolatyn. 2014 jylǵy álem chempıonatynyń ashylý oıyny 12 maýsymda San-Paýlýda ótedi: munda Brazılııa quramasy Horvatııa quramasymen oınaıdy. Al týrnır fınaly 13 shildede Rıo-de-Janeırodaǵy «Marakana» stadıonynda bolmaq. Chempıonatqa 32 komanda qatysady. Qazirgi ýaqytta chempıonattyń shamamen 3 mln.-ǵa jýyq bıleti satyldy.
