FIFA blokcheındi qarastyrady: Infantıno fýtbol jankúıerleri úshin jahandyq tokendi usynady
ASTANA. KAZINFORM — FIFA prezıdenti Djannı Infantıno uıym óziniń krıptovalıýtalyq tokenin shyǵarýy múmkin ekenin aıtty.
Ótken aptada Aq úıde AQSh Prezıdenti Donald Tramp qatysqan krıptovalıýtaǵa baılanysty sammıtte sóz sóılegen ol FIFA óziniń jahandyq fanbazasy úshin tsıfrlyq token shyǵarýǵa qyzyǵýshylyq tanytyp otyrǵanyna toqtaldy.
— FIFA Amerıkada FIFA coin ázirleý boıynsha erekshe qyzyǵýshylyq tanytyp otyr. Bul búkil álemdegi 5 mıllıard jankúıerdi qamtıdy. FIFA-men seriktes bolǵysy keletinder úshin biz ashyqpyz. Amerıka Qurama Shtatymen birge biz fýtbol álemin baǵyndyra alamyz, — dedi Infantıno.
Bul jaıly ázirge egjeı-tegjeıli aıtylǵan joq. Іske qosý merzimi belgisiz. FIFA blokcheındi jankúıerlermen ózara baılanys jasaý jáne tabys tabý quraly retinde qarastyratynyn kórsetedi.
Buǵan baılanysty Tramp oń pikirin bildirip, token FIFA-nyń ózinen góri qymbatqa túsýi múmkin ekenin tilge tıek etti. Bul óte perspektıvaly moneta bolýy múmkin.
Sammıtten keıin FIFA dep atalatyn affılıırlenbegen krıptovalıýta bir kúnde 357 000%-ǵa ósken. Onyń FIFA-men eshqandaı baılanysy joq. Ol boıynsha naryqtyq kapıtaldandyrýǵa 8,2 mıllıon dollarǵa jetti.
Infantınonyń habarlandyrýy AQSh, Kanada jáne Meksıka birlesip uıymdastyratyn 2026 jylǵy fýtboldan álem chempıonatyna daıyndyq retinde FIFA-nyń krıptovalıýtaǵa degen qyzyǵýshylyǵyn kórsetedi.
AQSh prezıdenti Donald Tramp buǵan deıin Bitcoin strategııalyq rezervin qurý týraly jarlyqqa qol qoıǵany edi. Sammıt barysynda úkimetke salyq tóleýshilerdiń qarajatyn tartpaı-aq krıptovalıýtaǵa ıelik etýge múmkindik beretin AQSh-tyń Strategııalyq Bitcoin-rezervin qalyptastyrý jospary usynyldy.
Eske salsaq, budan buryn FIFA 2025 jylǵy klýbtar arasyndaǵy álem chempıonatynyń kýbogyn tanystyrdy.