FIFA bıylǵy álem chempıonatyndaǵy júlde qoryn $871 mln-ǵa deıin arttyrdy
ASTANA. KAZINFORM — Halyqaralyq fýtbol federatsııasy (FIFA) 2026 jylǵy álem chempıonatynyń júlde qoryn 871 mln AQSh dollaryna deıin ulǵaıtýdy bekitti. Sheshim Kanadanyń Vankýver qalasynda ótken uıym keńesiniń otyrysynda qabyldandy, dep habarlaıdy federatsııanyń resmı saıty.
FIFA málimettinshe, júlde qory 15 paıyzǵa ósti. Qarjy týrnırge qatysatyn 48 komanda arasynda bólinedi.
Uıym ókilderi tólemder qaıta qaralýyn týrnırdiń kommertsııalyq tabysymen jáne ulttyq federatsııalardyń logıstıka, salyqtar men qatysýdy uıymdastyrý boıynsha shyǵyndarynyń artýymen baılanystyrdy.
Jańartylǵan sharttarǵa sáıkes, ár komandaǵa buryn qarastyrylǵan $10,5 mln ornyna keminde $12,5 mln beriledi. Daıyndyqqa bólinetin qarajat komanda úshin $2,5 mln-ǵa deıin ulǵaıtyldy, al kvalıfıkatsııalyq jarna $10 mln-ǵa kóterildi.
Qosymsha delegatsııa shyǵyndaryna jáne bılet kvotasyn keńeıtýge sýbsıdııalar qarastyrylǵan. Bul maqsattarǵa $16 mln-nan astam qarajat bólingen.
Tabys bóligi FIFA-nyń 211 múshelik assotsıatsııasy arqyly álem fýtbolyn damytýǵa qaıta bólinedi.
2026 jylǵy álem chempıonaty 11 maýsym men 19 shilde aralyǵynda AQSh, Kanada jáne Meksıkada ótedi. Týrnırge alǵash ret 48 komanda qatysady.
Buǵan deıin FIFA bıylǵy ÁCh matchtary bıletteriniń jańa partııasyn satylymǵa shyǵarǵany týraly jazǵan bolatynbyz.
Sondaı-aq bıylǵy álem chempıonatynyń fınaldyq matchynyń bıletteri tarıhtaǵy eń joǵary baǵaǵa jetti. FIFA belgilegen jańa qun boıynsha eń qymbat bılettiń baǵasy — 10 990 dollar.
