FIFA basshysy reseılik komandalarǵa salynǵan shekteýlerdi alyp tastaýdy usyndy

ASTANA. KAZINFORM – Halyqaralyq fýtbol federatsııasynyń (FIFA) prezıdenti Djannı Infantıno reseılik komandalardy halyqaralyq týrnırlerden shettetý máselesin qaıta qaraý qajet dep sanaıdy. Bul týraly DW jazdy.

– Biz muny qarastyrýymyz kerek. Óıtkeni bul tyıym esh nátıje bermedi, kerisinshe, odan ári kóńilsizdik pen óshpendilikti kúsheıtti, – dedi Infantıno Sky News telearnasyna bergen suhbatynda.

Onyń aıtýynsha, Reseıden shyqqan qyzdar men uldar Eýropanyń ózge bólikterinde fýtbol oınaı alsa, paıdaly bolar edi.

Sonymen qatar FIFA basshysy Izraıl quramalaryn jarystarǵa qatystyrýǵa tyıym salýǵa da qarsy ekenin bildirdi. Onyń pikirinshe, mundaı sheshim jeńilis bolyp sanalady.

Infantıno FIFA erejelerine ózgerister engizý múmkindigin qarastyrý qajet ekenin atap ótti. Onyń sózinshe, uıym «saıası kóshbasshylardyń áreketterine baılanysty eshbir elge fýtbol oınaýǵa tyıym salmaý kerek» degen qaǵıdany óz jarǵysynda bekitýi tıis. Fýtbol arqyly baılanystardy saqtap qalý mańyzdy ekenin de qosty.

Reseı quramalary men klýbtary 2022 jyly FIFA jáne Eýropalyq fýtbol qaýymdastyqtary odaǵy (UEFA) aıasyndaǵy jarystardan shettetilgen bolatyn. The Times basylymynyń málimetinshe, FIFA keńesi bul másele boıynsha daýys berý ótkizýdi ázirge josparlap otyrǵan joq.

2023 jyly FIFA Reseıdiń 17 jasqa deıingi uldar men qyzdar quramalaryna salynǵan tyıymdy alyp tastaǵanymen, is júzinde shekteýler saqtalyp qaldy. Sebebi eldiń jasóspirimder komandalary ÝEFA irikteý týrnırlerine qatysa almaıdy. Atap aıtqanda, Anglııa, Ýkraına, Polsha jáne Shvetsııa reseılik komandalarmen oınaýdan bas tartty.

Aıta keteıik, buǵan deıin FIFA fýtbol erejesine ózgeris engizýi múmkin ekeni habarlandy.