FIFA basshysy Meksıkanyń álem chempıonatyn ótkizýge daıyn ekenine senim bildirdi
ASTANA. KAZINFORM — FIFA prezıdenti Djannı Infantıno telefon arqyly Meksıka prezıdenti Klaýdııa Sheınbaýmmen sóılesip, eldiń bıylǵy fýtboldan álem chempıonatyn tabysty ótkize alatynyna senim bildirdi. Bul týraly FIFA prezıdenti óziniń Instagram jelisindegi paraqshasynda jazdy.
«Búgin Meksıka prezıdenti Klaýdııa Sheınbaýmmen tamasha áńgime órbidi. Biz qabyldaýshy elge tolyq senim bildiretinimizdi taǵy da jetkizdim. Búgingi kúnge deıingi eń aýqymdy ári ınklıýzıvti FIFA álem chempıonaty bolǵaly otyrǵan bul týrnırdiń barlyq josparlanǵan matchtaryn asyǵa kútemiz», dep jazdy Infantıno Instagram áleýmettik jelisinde.
Aıta keteıik, buǵan deıin Meksıkanyń federaldyq qaýipsizdik kúshteri Halısko shtatynyń astanasy Gvadalaharadan shamamen 130 shaqyrym ońtústikte ornalasqan Tapalpa eldi mekeninde «Halısko jańa býyny» (CJNG) karteline qarsy áskerı operatsııa júrgizdi.
Qaqtyǵys barysynda CJNG jetekshisi «El Mencho» laqap atymen belgili Nemesıo Osegera Servantestiń kózi joıylǵany habarlandy.
Operatsııadan keıin, boljam boıynsha qylmystyq toptyń qarymta áreketi retinde, Halısko shtatynda jáne eldiń birqatar óńirinde joldar jappaı jabylyp, avtokólikter men kommertsııalyq nysandar órteldi.
Halısko shtatynyń bıligi turǵyndardy úılerinde bolýǵa shaqyryp, qoǵamdyq kólik jumysyn toqtatty jáne qoǵamdyq qaýipsizdikke tóngen qaterge baılanysty «qyzyl dabyl» rejımin engizdi.
«El Menchonyń» kózin joıýdan keıingi zorlyq-zombylyq tolqyny saldarynan 73 adam qaza tapty, olardyń ishinde 25 quqyq qorǵaý organdarynyń qyzmetkeri bar.
