FIFA álem chempıonatynda tóreshilerdiń ókilettigin keńeıtpek
ASTANA. KAZINFORM — FIFA 48 komanda qatysatyn týrnırdiń bastalýyna eki aptadan az ýaqyt qalǵanda tóreshilerge arnalǵan negizgi nusqaýlyqtardy jarııalady. Bul týraly Associated Press agenttigi habarlady.
Negizgi maqsat — matchtardyń qarqynyn tómendetpeý.
tóreshilerge oıyn ýaqytyn sozatyn kez kelgen áreketti qatań toqtatý týraly naqty nusqaý berdi. Jańa ózgeristerdiń biri — buryshtama soqqysy men dopty alańǵa laqtyrý kezinde 5 sekýndtyq keri sanaý engizý. Eger osy ýaqyt ishinde dop oıynǵa qosylmasa, burysh soǵý nemese laqtyrý quqyǵy qarsylas komandaǵa ótedi. Bul qaqpashylarǵa qatysty qoldanystaǵy 8 sekýndtyq erejeniń jalǵasy.
Sondaı-aq oıynshy tóreshiniń sheshimine kelispeı alańnan óz erkimen ketse, qyzyl qaǵaz alýy múmkin. Al aýystyrylatyn fýtbolshy alańdy 10 sekýnd ishinde tastap ketýge mindetti. Bul ereje jaraqat pen erekshe jaǵdaılarǵa qatysy joq.
Qosymsha qatań ereje — aýyzdy jabý arqyly sóılesý. Eger tóreshi muny janjal týdyratyn áreket dep baǵalasa, oıynshy qolymen, jeńimen nemese fýtbolkasymen aýzyn jaýyp sóılese, birden qyzyl qaǵaz kórsetiledi.
— Qarsylasý — múlde bólek jaǵdaı, dep atap ótti FIFA tóreshiler komıtetiniń basshysy Perlýıdjı Kollına.
VAR júıesiniń ókileti de keńeıtildi: endi ol qate berilgen ekinshi sary qaǵazdardy, qate oıynshyny anyqtaý jaǵdaılaryn jáne qate buryshtama taǵaıyndaýlaryn teksere alady. Sonymen qatar VAR standarttyq jaǵdaılar aldynda — golǵa, penaltıge nemese tártiptik jazaǵa ákelse, bolǵan qatelikterdi de qaraı alady.
Soǵan qaramastan, match uzaqtyǵy qysqarmaıdy: ár taım ortasynda úsh mınýttyq sý ishý úzilisi qarastyrylǵan.
Aıta keteıik, Iran fýtboldan álem chempıonatyna qatysý úshin FIFA-ǵa 10 talap qoıdy.
