FIFA álem chempıonatyna qatysatyn quramalar sanyn 64-ke deıin arttyrýdy qarastyrýy múmkin
ASTANA. KAZINFORM – FIFA prezıdenti Djannı Infantıno erler arasyndaǵy fýtboldan álem chempıonatyna qatysatyn quramalar sanyn 64-ke deıin kóbeıtý múmkindigin qarastyrýdy usyndy. Onyń aıtýynsha, bul álem chempıonatyn shyn máninde jahandyq týrnırge aınaldyrýǵa múmkindik beredi, dep habarlaıdy BBC Sport.
Infantınonyń aıtýynsha, FIFA bul máseleni 2026 jylǵy álem chempıonaty aıaqtalǵannan keıin talqylaıdy.
– Álem chempıonatyn uıymdastyrǵanda tek Eýropa men Ońtústik Amerıka úshin emes, búkil álem úshin ótkizý mańyzdy. Barlyq eldiń bul týrnırge qatysýdy armandaýǵa múmkindigi bolýy kerek. Eger shaǵyn memleketterdiń álem chempıonatyna qatysýyna jol ashpasaq, olardyń damýǵa degen yntasy da azaıady, – dedi Djannı Infantıno.
Ol 48 quramanyń qatysýymen ótip jatqan qazirgi álem chempıonatyn tabysty joba dep baǵalady.
– Afrıkadan kelgen on quramanyń toǵyzy toptyq kezeńnen ótti. Al ótken álem chempıonatynda qurlyqtan nebári bes qurama ǵana óner kórsetti. Bul qatysýshylar sanyn kóbeıtýdiń qanshalyqty mańyzdy ekenin kórsetedi, – dedi FIFA prezıdenti.
Eske salsaq, 2017 jyly FIFA keńesi álem chempıonatyna qatysatyn quramalar sanyn 32-den 48-ge deıin ulǵaıtý týraly sheshim qabyldaǵan bolatyn.
Al 2025 jyldyń sáýirinde Ońtústik Amerıka fýtbol konfederatsııasy (CONMEBOL) 2030 jylǵy álem chempıonatyna qatysatyn komandalar sanyn 64-ke deıin arttyrýdy resmı túrde usyndy. Bul másele boıynsha ázirge túpkilikti sheshim qabyldanǵan joq.
Alaıda bul bastamaǵa fýtbol uıymdarynyń bári birdeı qoldaý bildirip otyrǵan joq.
ÝEFA prezıdenti Aleksander Cheferın mundaı ózgeristi «sátsiz ıdeıa» dep baǵalap, onyń týrnırdiń ózine de, irikteý kezeńine de keri áser etetinin aıtty.
Azııa fýtbol konfederatsııasynyń prezıdenti sheıh Salman ben Ibrahım Ál Halıfa da bul usynys «beıbereketsizdikke ákelýi múmkin» dep esepteıdi.
Al Soltústik jáne Ortalyq Amerıka men Karıb basseıni fýtbol konfederatsııasynyń (KONKAKAF) prezıdenti Vıktor Montalıanı qatysýshylar sanyn ulǵaıtý «fýtbol ekojúıesine keri áser etedi» degen pikir bildirdi.
Sonymen qatar Aq úıdiń álem chempıonatyn uıymdastyrý jónindegi jumys tobynyń atqarýshy dırektory Endrıý Djýlıanı AQSh 2038 jylǵy álem chempıonatyn qabyldaýǵa ótinim berýge daıyn ekenin jáne 64 quramanyń qatysýymen ótetin týrnırdi de ótkize alatynyn málimdedi.
FIFA erejesine sáıkes, uıym keńes músheleri usynǵan barlyq bastamany qaraýǵa mindetti. Degenmen qatysýshylar sanyn 64-ke deıin arttyrý týraly túpkilikti sheshimdi FIFA keńesi qabyldaıdy.
Aıta keteıik, 2030 jylǵy fýtboldan álem chempıonaty Ispanııa, Portýgalııa jáne Marokkoda ótedi. Týrnırdiń alǵashqy úsh matchy Argentına, Ýrýgvaı jáne Paragvaıda uıymdastyrylyp, 1930 jylǵy alǵashqy álem chempıonatynyń 100 jyldyǵyna arnalady.
Buǵan deıin álem chempıonatynyń jartylaı fınalyndaǵy oıyndar qaı telearnadan kórsetiletini habarlandy.
