FIFA ÁCh-2022-ni Katarda qarasha nemese jeltoqsan aılarynyń birinde ótkizbek
ASTANA. QazAqparat - FIFA prezıdenti Iozef Blatter 2022 jylǵy fýtboldan álem chempıonaty Katarda qarashada nemese jeltoqsanda ótýi tıis degen pikirin bildirdi, dep habarlady RBK.
Onyń aıtýynsha, jazǵy ýaqytta qatty ystyq qatysýshylarǵa jaısyzdyq týdyrýy múmkin.
«Katarda jazǵy ýaqytta oıyn ótkizý múmkin emes. Jyl aıaǵy, qarasha-jeltoqsan aılary yńǵaıly bolady», - dedi Blatter.
Eske salsaq, budan buryn ÁCh qańtarǵa nemese aqpanǵa aýystyrylady dep boljanǵan.
ÁCh-2022-ni qysqy mezgilge aýystyrýǵa Eýropa chempıonatynyń ókilderi, atap aıtqanda aǵylshyn premer-lıgasy qarsy shyqty. Keıbir eýropalyq sheneýnikter álem chempıonaty saldarynan ulttyq birinshilik bir aıdan astam ýaqytqa keshiktiriletinine kelispedi.
Týrnır ótkizetin eldi tańdaǵan ýaqytta katarlyq ókilder eń zamanaýı stadıon salyp qana qoımaı, qýatty salqyndatatyn qondyrǵy ornatamyz dep ýáde bergen. Saılaýdan keıin-aq onyń múmkin emestigi aıtylyp, bul sheshim synǵa tústi.
Aptap ystyqtan bólek, Katarda álem chempıonatyn uıymdastyrýshylar basqa da problemalarmen betpe-bet kelgen. Máselen, olar stadıon salý kezinde mıgranttardy zańsyz jumysqa tartqandyǵy, nysandarda qaza tapqandar men zardap shekkenderdiń kóptigi úshin aıyptalyp otyr.
Budan basqa, katarlyq ótinim sybaılas jemqorlyq jáne FIFA atqarýshy komıteti múshelerin paraǵa jyǵý turǵysynan tergelýde. Alaıda Halyqaralyq fýtbol federatsııasy bul tergeýdiń nátıjesi qupııa kúıinde qalatynyn málimdedi.
