FIFA 2027 jylǵa deıin Qazaqstanda 100 shaǵyn fýtbol alańyn salady
ASTANA. KAZINFORM — Qazaqstan halyqaralyq FIFA Arena jobasyn júzege asyrý týraly kelisimge alǵashqylardyń biri bolyp qol qoıdy, dep habarlaıdy Týrızm jáne sport mınıstrliginiń baspasóz qyzmeti.
Mınıstrlik málimetinshe, bul bastama balalar men jasóspirimder fýtbolyn damytýǵa jáne mektep oqýshylaryna zamanaýı sport ınfraqurylymyna teń qoljetimdilik jasaýǵa baǵyttalǵan.
— Joba aıasynda elimizdegi jalpy bilim beretin mektepterdiń aýmaǵynda 100 shaǵyn fýtbol alańy salynady. Bul — jobaǵa qatysýshy elder arasyndaǵy eń joǵary kórsetkish. Alǵashqy alańdar bıyl Hromtaý men Kókshetaý qalalarynda paıdalanýǵa beriledi. Baǵdarlamany tolyq aıaqtaý 2027 jylǵa josparlanǵan, — delingen vedomstvo habarlamasynda.
Jobany Qazaqstan fýtbol federatsııasy QR Týrızm jáne sport mınıstrliginiń qoldaýymen júzege asyryp jatyr.
Ár alań FIFA standartyna sáıkes salynady: kólemi 20×40 metr, jańa býyndaǵy jasandy shóp jabyny tóseledi (non-infill turf), kiriktirilgen qaqpa, qorshaý panelderi men qaýipsizdik torlary ornatylady.
Ámbebap qurylym alańdardy qoldanystaǵy mektep aýlalary men sport aımaqtaryna yńǵaıly túrde salýǵa múmkindik beredi. Joba eń aldymen shaǵyn qalalar men aýyl mektepterin qamtıdy.
Qarjylandyrýdy FIFA qamtamasyz etse, QR Týrızm jáne sport mınıstrligi, Oqý-aǵartý mınıstrligi men jergilikti atqarýshy organdar uıymdastyrýshylyq qoldaý kórsetedi.
— Búginde fýtbol elimizdiń barlyq óńirinde damyp, eń tanymal buqaralyq sport túrleriniń biri sanalady. Qazirgi tańda fýtbolmen 1,1 mıllıonnan astam adam júıeli túrde aınalysady. Odan bólek 7 378 jattyqtyrýshy jumys isteıdi. Elimizde 280 stadıon, 148 fýtbol maneji, 7 myńnan astam mektep alańy jáne 400-den asa dene shynyqtyrý-saýyqtyrý kesheni bar. Premer-lıgada 14 kásibı klýb óner kórsetse, 242 balalar-jasóspirimder sport mektebinde 40 myńnan astam jas fýtbolshy daıyndalyp jatyr, — degen derek keltirdi mınıstrlik.
Keıingi jyldary elimizde FIFA jáne ÝEFA-nyń qoldaýymen Talǵarda ulttyq quramalarǵa arnalǵan oqý-jattyǵý bazasy, Astanadaǵy Fýtbol úıi men manej, Shymkenttegi jeke «BIІK» bazasy jáne Qostanaıdaǵy «Tobol» klýbyna arnalǵan tolyqqandy manej salyndy.
Budan buryn Almaty oblysynda FIFA standarty boıynsha fýtbol akademııasy salynatyny anyqtaldy.