FIFA-2026: Japonııa Týnısti oısyrata jeńip, pleı-offtan shettetti
ASTANA. KAZINFORM — Japonııa quramasy 2026 jylǵy fýtboldan álem chempıonatynyń toptyq kezeńindegi ekinshi týr matchynda Týnısti iri eseppen jeńdi, dep habarlaıdy Kazinform tilshisi.
F toby aıasyndaǵy kezdesý Meksıkanyń Gýadalýpe qalasyndaǵy BBVA stadıonynda ótip, japondardyń 4:0 esebindegi senimdi jeńisimen aıaqtaldy.
Esep matchtyń 6-mınýtynda-aq ashyldy. Japonııa quramasynyń sapynan Daıtı Kamada mergendik tanytty. Al 31-mınýtta Aıase Ýeda esep aıyrmasyn eki dopqa jetkizdi. Ekinshi taımda Dzıýnıa Ito 69-mınýtta úshinshi goldy soqsa, 83-mınýtta Ýeda dýbl avtory atanyp, matchtyń qorytyndy esebin belgiledi.
Bul jeńis Japonııa úshin týrnırdegi alǵashqy jeńis boldy. Buǵan deıin komanda alǵashqy týrda Nıderlandpen 2:2 esebimen teń túsken edi.
Al Týnıs quramasy qatarynan ekinshi ret jeńilis tapty. Afrıkalyq komanda alǵashqy oıynda Shvetsııaǵa 1:3 esebimen jol bergen bolatyn. Eki týrdan keıin upaı jınaı almaǵan Týnıs pleı-off kezeńine shyǵý múmkindiginen aıyryldy.
Eske salaıyq, 2026 jylǵy álem chempıonaty AQSh, Meksıka jáne Kanadada ótip jatyr. Toptyq kezeń 27 maýsymǵa deıin jalǵasady. Pleı-offqa ár toptan úzdik eki qurama, sondaı-aq úshinshi oryn alǵan eń úzdik segiz komanda joldama alady.
Buǵan deıin Ekvador men Kıýrasao quramalarynyń matchynda jeńimpaz anyqtalmaı, kezdesý 0:0 esebimen aıaqtalǵan bolatyn.
