FIFA: 2022 jyly Álem chempıonaty jazda emes, qysta ótýi yqtımal
ASTANA. 8 qańtar. QazAqparat - Katarda ótetin fýtboldan Álem chempıonaty 2022 jyldyń 15 qarasha men 15 qańtar aralyǵynda ótýi bek múmkin. Bul týraly Halyqaralyq fýtbol qaýymdastyqtary federatsııasynyń (FIFA) Bas hatshysy Jerom Valke málim etti, dep habarlaıdy ITAR-TASS agenttigi.
Katardaǵy Álem chempıonatynyń ótetin ýaqyty ózgerýi múmkin degen aqparatty budan buryn kóptegen fýtbol qaıratkerleri aıtqan bolatyn. Sonyń ishinde FIFA prezıdenti Iozef Blatter da bar. Birinshiliktiń merzimin shegerý jónindegi áńgimege negizinen jazǵy merzimderdegi Katar elinde bolatyn aptap ystyq sebepker bolyp otyr. Munda jaz aılarynda Tselsıı boıynsha plıýs 50 gradýsqa deıin ysıdy.
«Katarda fýtbol oınaýǵa naǵyz saı keletin merzim - 15 qarashadan qańtar aıynyń sońyna deıingi aralyq», - deıdi Jerom Valke.
Týrnırdiń ýaqytyna qatysty sońǵy sheshim 2014 jyldyń jeltoqsan aıynda atqarýshy komıtettiń otyrysynda qabyldanbaq.
