FIFA 2018 jyly Reseıde ótkizilýi josparlanǵan fýtboldan ÁCh-ǵa baıkot jarııalaýǵa qarsy
ASTANA. QazAqparat - Halyqaralyq fýtbol qaýymdastyǵy federatsııasy (FIFA) 2018 jyly Reseıde ótkizilýi josparlanǵan fýtboldan álem chempıonatyna baıkot jarııalaýǵa qarsy ekendikterin bildirdi, dep habarlaıdy FIFA-nyń baspasóz qyzmeti.
Bul týraly ITAR-TASS jazady.
«FIFA kez kelgen beıbit jáne demokratııalyq dıskýssııany qoldaıdy jáne kúsh kórsetýdiń kez kelgen túrin qoldamaıdy. FIFA ótkizetin ár týrnırdiń maqsaty - ózara túsinýshilik pen halyqtar arasyndaǵy dostyqty nasıhattaý. Tarıh kórsetkendeı, sporttyq sharalarǵa baıkot jarııalaý - máseleni sheshýdiń tıimdi joly emes, kerisinshe ÁCh-2018 elder arasynda dıalog ornatýǵa jáne áleýmettik ózgerister jasaýǵa qýatty serpilis berýi múmkin», delingen habarlamada. - Biz buǵan deıin álem chempıonattary adamdardyń basyn qalaı qosa alǵandyǵyn kórdik, 2018 jyly dál sondaı kóriniske kýá bolamyz dep senemiz».
ÁCh-2018 8 maýsymnan 8 shilde aralyǵynda 11 qalada 12 stadıonda ótedi dep josparlanýda.
