«FIFA-2018» matchtaryna baratyn qazaqstandyqtarǵa medıtsınalyq saqtandyrý qajet
MÁSKEÝ. QazAqparat - Qazaqstannyń Reseıdegi elshiligi fýtboldan Álem chempıonaty ótetin kezde Reseıge baratyn Qazaqstan azamattaryna halyqaralyq úlgidegi medıtsınalyq saqtandyrý alýǵa keńes beredi, dep habarlaıdy «QazAqparat» HAA tilshisi.
«25 mamyrdan 25 shildege deıingi aralyqta fýtboldan Álem chempıonaty ótýine baılanysty, sheteldik azamattardyń Reseı Federatsııasynda tirkelý erejesi ózgertildi. Ózgerister tek matchtar ótetin: Máskeý, Sankt-Peterbýrg, Qazan, Sochı, Volgograd, Ekaterınbýrg, Kalınıngrad, Nıjnıı Novgorod, Dondaǵy Rostov, Samara jáne Saransk qalalarynda júredi. Sondyqtan osy kezeńde Reseıge baratyn barlyq qazaqstandyqtar atalǵan qalalarǵa kelgennen soń úsh kún ishinde RF ІІM aýmaqtyq organdaryna nemese Memlekettik jáne mýnıtsıpıaldyq qyzmetterdiń kópfýnktsııaly ortalyqtaryna júginýi tıis», - deıdi Elshiliktiń baspasóz hatshysy J. Kolbachaeva.
RF ІІM aýmaqtyq organdary men Kópfýnktsııaly ortalyqtar bul kezeńde kúsheıtilgen rejimde jumys isteıdi. Tirkeý merzimi chempıonat matchtary ótetin qalaǵa kelgen kúnnen bastap esepteledi.
Elshilik baspasóz hatshysynyń aıtýynsha, chempıonat matchtary ótetin árbir qalanyń ózine tán ákimshilik-quqyqtyq erekshelikteri bolýy múmkin.
«Máselen, Sankt-Peterbýrg ákimshiligi Chempıonat ótetin kezde qalaǵa avtomobılderdiń kelýin shekteý týraly sheshim qabyldady. Osyǵan baılanysty, qazaqstandyqtarǵa Sankt-Peterbýrgke jeke kóligimen barmaýǵa keńes beremiz», - deıdi J. Kolbachaeva.
RF aýmaǵyna kirgen Qazaqstan azamattary tólqujat baqylaýynan óterde mindetti túrde kóshi-qon kartasyn alýy tıis.
Ózi barǵan qalaǵa tirkelý úshin tulǵasyn kýálandyratyn qujatty (kýálik nemese tólqujat), kóshi-qon kartasyn, shetel azamatynyń kelýi týraly qaǵazdy toltyrý jáne ótinish jazyp tapsyrý qajet.
Qonaqúılerde, shıpajaılarda, demalys úıleri nemese basqa da ýaqytsha ornalasý oryndarynda ýaqytsha turatyn Qazaqstan azamattarynyń tirkelýine qabyldaýshy tarap (qonaqúı, sanatorıı, t.b. ákimshiligi) jaýapty.
«Sonymen qatar, Chempıonat kezinde Reseıge baratyn Qazaqstan azamattaryna óz qaýipsizdigin saqtaý maqsatynda halyqaralyq úlgidegi medıtsınalyq saqtandyrý resimdep alýǵa keńes beremiz», - dedi ol.
Konsýldyq okrýgterge sáıkes, RF aýmaǵyndaǵy QR azamattary júginýine bolatyn konsýldyqtar tizimin myna jerden kórýge bolady.
