Fıdjıdi orasan daýyl ábigerge saldy
ASTANA. QazAqparat - Ótken túnde shaǵyn tynyqmuhıttyq Fıdjı memleketine tap bolǵan «Ýınston» tropıkalyq daýyly saldarynan keminde bir adam mert boldy.
21 aqpan kúngi tańerteńgi saǵattarda kelip túse bastaǵan aqparattarǵa qaraǵanda, qurbandar sany arta túsýi múmkin, dep habarlady TASS.
«Apattar aýqymy orasan, alaıda qansha adam zardap shegip, qansha úı qıraǵany týraly ázirge aıtý erterek», - dep habarlady jańazelandııalyq radıoǵa Fıdjı astanasy - Sývede bolǵan Halyqaralyq Qyzyl Krest komıtetiniń qyzmetkeri.
Tsıklonnyń oshaǵy eń iri fıdjılik Vıtı-Levý aralynan soltústikke taman ótti, bul aralda el halqynyń 70 paıyzǵa jýyǵy turatyn jáne astana men halyqaralyq Nadı áýejaıy ornalasqan.
Tsıklonǵa eń joǵary sanattaǵy qýattylyq berildi - meteorologtardyń málimetterinshe, daýyl oshaǵy mańynda jeldiń jyldamdyǵy saǵatyna 230 shaqyrymǵa, al uıtqýy - saǵatyna 325 shaqyrymǵa, aral jaǵalaýlaryndaǵy muhıt tolqynynyń bıiktigi 12 metrge jetti.
Ókimet oryndary halyqty qaýip jóninde aldyn ala eskertti jáne 750-den astam kóshirý ortalyqtary men baspanalar ashty. Ásirese, shalǵaı araldar men eńiste ornalasqan aýdandardyń aýyldaryndaǵy jaǵdaı alańdaýshylyq týǵyzýda.
Senbi kúni Fıdjı úkimeti apatty jaǵdaıǵa baılanysty komendanttyq saǵat engizgen bolatyn,. Tańerteń onyń kúshi kúndizgi ýaqyttarǵa da uzartyldy.
Qazirgi kezde «Ýınston» daýyly Fıdjı arhıpelagynyń batys bettegi negizgi araldarynan saǵatyna 22 shaqyrymǵa jýyq jyldamdyqpen jylystap barady. Onyń jolynda fıdjılik ıAsava araldary qalyp otyr.
