Fıdel Kastronyń máıiti krematsııalanady
ASTANA. QazAqparat - Raýl Kastro óziniń aǵasy, Kýba revolıýtsııasynyń kóshbasshysy Fıdel Kastronyń senbi kúni krematsııalanatynyn habarlady, dep jazdy Frans Press agenttigi.
Kýba revolıýtsııasynyń kóshbasshysy Fıdel Kastro juma kúni 90 jasynda jergilikti ýaqytpen 22:29-da dúnıeden ozdy. Bul týraly Raýl Kastro memlekettik telearna arqyly málim etti, dep habarlady RIA Novostı.
Fıdel Kastro - kýbalyq revolıýtsıoner, memlekettik jáne saıası qaıratker. 1926 jyly 13 tamyzda dúnıege kelgen. 1976 jyldyń jeltoqsan aıynan bastap, 30 jyl boıy Kýba Memlekettik keńesi men Mınıstrler keńesiniń tóraǵasy boldy. Sonymen birge, F.Kastro Revolıýtsııalyq qarýly kúshterdiń bas qolbasshysy jáne Ulttyq qorǵanys keńesiniń tóraǵasy qyzmetin atqarǵan. Ol 2006 jyly 31 shildede densaýlyǵynyń syr berýine baılanysty óz mindetin - Memlekettik keńes pen Mınıstrler keńesiniń basshysy qyzmetin inisi Raýl Kastroǵa tapsyrdy.
