Fıdel Kastronyń kúli Santıago-de-Kýbaǵa jerlendi
ASTANA. QazAqparat - Kýba revolıýtsııasynyń kósemi Fıdel Kastronyń máıitiniń kúli Santıago-de-Kýba qalasynyń zıratyna jerlendi, dep habarlaıdy QazAqparat BBC-ge silteme jasap.
Jergilikti telearna jerleý rásimin tikeleı efırden kórsetti. Fıdel Kastronyń múrdesiniń kúli salynǵan saýytty kortej alyp júrdi. Zıratqa deıin kortej sońynan ondaǵan myń adam ilesip keldi. Rásimge onyń baýyry, Kýba basshysy Raýl Kastro jetekshilik etti. Aıta keteıik, F.Kastronyń kúli azattyq qozǵalysynyń ózge kóshbasshysy Hose Martıdiń qabiriniń janyna jerlendi.
Fıdel Kastro 25 qarasha kúni 90 jasynda dúnıeden ozdy. Kýba basshysynyń qalaýymen onyń denesi krematsııalandy. Kastro - kýbalyq revolıýtsıoner, memlekettik jáne saıası qaıratker, 1926 jyldyń 13 tamyzynda dúnıege kelgen. 1976 jyldan beri 30 jyl boıy Kýba Memlekettik keńesi men Mınıstrler keńesiniń tóraǵasy boldy. Sondaı-aq Revolıýtsııalyq qarýly kúshterdiń bas qolbasshysy jáne eldiń Ulttyq qaýipsizdik keńesiniń tóraǵasy qyzmetterin atqardy.
