Fıdel Kastro Kýba teledıdaryna keńeıtilgen suhbat berdi
ASTANA. Shildeniń 13-i. QazAqparat - Kýba revolıýtsııasynyń kósemi Fıdel Kastro biraz ýaqytqa sozylǵan únsizdikten keıin birinshi ret memlekettik teledıdarǵa keńeıtilgen formatta suhbat berdi. Habar Kýbanyń «Mesa Redonda» atalatyn baǵdarlamasynda shildeniń 12-sinde ótti, dep habarlaıdy Lenta.Rý.
Telesuhbatta Kastro birqatar halyqaralyq ózekti ahýaldarǵa qatysty, atap aıtqanda «Chhonan» ońtústikkoreıalyq korvetiniń sýǵa batyp ketýine baılanysty KHDR men Ońtústik Koreıa arasyndaǵy jaǵdaıdyń shıelene túsýi jáne Taıaý Shyǵystaǵy jaǵdaılarǵa qatysty óziniń jeke pikirin bildirdi.
Bul Kastronyń bir jylǵa deıin sozylǵan uzaq únsizdikten keıingi buqaraǵa bergen alǵashqy telesuhbaty. CNNnen bastap batystyń kóptegen arnalary talasa kórsetken suhbattan 2006 jyly kúrdeli operatsııa jasatqan 83 jastaǵy Kastronyń qazirgi ýaqytta densaýlyǵynyń jaqsy ekendigin baıqaýǵa bolady. Onyń sóıleý ekpini baıaýlaý bolǵanymen oıy anyq, tili jatyq jáne ol telekamera aldynda ózin jaqsy ustaı bilgen.
Fıdel Kastro ózine jasalǵan operatsııadan keıin 2010 jylǵy shildede birinshi ret buqaralyq sharalarǵa qatysyp, Gavanadaǵy ǵylymı-zertteý ortalyǵynda boldy. Sapar barysynda ortalyq qyzmetkerleriniń sýretke túsirýi, Kýba revolıýtsııasy kóseminiń tórt jyl ishinde túsirilgen alǵashqy beıresmı sýretteri boldy.
