Fıdel Kastro Gavanada oqý kesheniniń ashylýyna qatysty
ASTANA. 11 sáýir. QazAqparat - Kýba tóńkerisiniń kóshbasshysy Fıdel Kastro Plaııa astanalyq mýnıtsıpııasyndaǵy "Vılma Espın Gılos" /Vilma Espin Guillois/ oqý kesheniniń ashylý rásimine qatysty.
«Granma» /Granma/ gazetiniń habarlaýynsha, saltanatty shara 9 sáýir kúni ótken.
Basylymnyń málimetterine súıensek, kýbalyq revolıýtsıonerdiń bastamasymen 11 aıdyń ishinde boı kótergen ǵımarat 140 oqýshyǵa laıyqty. Bilim ordasynda kitaphana, kompıýterlik zerthana, medıtsınalyq pýnkt, sporttyq alańqaılar jáne 34 balǵynǵa arnalǵan balabaqsha bar.
«Ortalyqty ashqan Fıdel qurylysshylardyń bar kúsh-jigerlerin jumsaǵandyǵyn erekshe atap ótti», - dep jazǵan gazet 86 jastaǵy saıasatkerdiń eki saǵatqa jýyq balalarmen, ustazdarmen, qurylysshylarmen jáne keshen jaıǵasqan aýdannyń turǵyndarymen áńgimeleskenin baıandaǵan.
