FIDE Qazaqstanda ótken blıts-shahmattan Álem chempıonatyn joǵary baǵalady

ASTANA. QazAqparat – Halyqaralyq shahmat federatsııasy (FIDE) elimizde alǵash ret ótken blıts-shahmattan Álem chempıonatynyń uıymdastyrylý deńgeıin joǵary baǵalady. Bul týraly Ortalyq kommýnıkatsııalar qyzmetinde ótken brıfıngide Qazaqstan shahmat federatsııasynyń vıtse-prezıdenti Dármen Sádýaqasov aıtty, dep habarlaıdy QazAqparat tilshisi.

«Bul Qazaqstan úshin erekshe oqıǵa boldy. Chempıonat burynǵyǵa qaraǵanda úlken masshtabta ótti. Qazaqstan buǵan deıin úlken jarystar, álem chempıonattaryn ótkizgen. Degenmen, mundaı kólemdegi týrnırlerdi biz áli uıymdastyrmaǵan edik. Biz barlyq uıymdastyrý komandasy, Qazaqstan shahmat federatsııasy jáne Halyqaralyq shahmat federatsııasymen birlesip josparly ári nátıjeli jumys atqardyq», - dedi Dármen Sádýaqasov.

Onyń aıtýynsha, Halyqaralyq shahmat federatsııasy (FIDE) chempıonattyń uıymdastyrylý deńgeıin joǵary baǵalaǵan.

«Bul bizge bolashaqta budan da basqa iri halyqaralyq jarystardy ótkizýge múmkindik beretin alań boldy dep zor senimmen aıta alamyz», - dep túıindedi shahmat federatsııasynyń vıtse-prezıdenti.