Fiat Chrysler 85 myńnan astam kóligin keri qaıtaryp alýda
ASTANA. QazAqparat - Fiat Chrysler kompanııasy búkil álemge tarap ketken Chrysler 200 markaly 85 myńnan astam kóligin elektronıkasyndaǵy aqaýyna baılanysty keri qaıtaryp alýda, dep habarlady sheteldik BAQ.
Aıta keterligi, tek 2015 jyly shyǵarylǵan kólikter ǵana keıin qaıtarylyp alynady. Olardyń basym bóligi AQSh-ta satylǵany belgili. Kompanııa ókiliniń aıtýynsha, elektr tizbegin biriktiretin jáne ajyratatyn mehanıkalyq qurylǵydaǵy aqaý kólik qurastyrylǵannan keıingi synaq barysynda anyqtalǵan.
Assoshıeıted press agenttiginiń naqtylaı túsýinshe, mundaı aqaýy bar kólik qozǵaltqyshy júrip kele jatqan kezde óship qalýy nemese qozǵaltqysh qoraby tosynnan ajyrap qalýy múmkin.
Fiat Chrysler kompanııasy ókilderiniń málimetinshe, mundaı aqaýy bar kólikterdiń jol ústinde buzylýy saldarynan oryn alǵan jol-kólik apaty jaıynda esh aqparat túspegen.
