Feısbýktiń Like batyrmasy kóńil-kúıdi bildiretindeı etip ózgertildi
ASTANA. QazAqparat - Facebook áleýmettik jelisi Like batyrmasynyń qyzmetin keńeıtýge kiristi. Unatýdan basqa, paıdalanýshylar ony basý arqyly aldaǵy ýaqytta mahabbatty, kúlgendi, kóńilsizdikti jáne ashýlanýdy bildire alady. Ózgeris kompıýtermen ashylatyn saıt nusqasynda, mobıldik nusqada jáne qosymshada iske qosyldy.
Facebook-tegi jazbanyń astyna kóńil kúıdi bildiretin smaılıkti qaldyrý úshin «Maǵan unaıdy» batyrmasyna basyp, sál kútseńiz jetkilikti. Mobıldik qosymshada Like batyrmasyn basqannan keıin, ekranda 5 qosymsha emotsııany tańdaýǵa bolady.
Ótken jyldyń kúzinde Facebook bul ózgeristi Ispanııa men Irlandııanyń paıdalanýshylary arqyly synady. Onda smaılıkter kópshilikke unaǵan edi. Sonyń arqasynda bul jańalyqty áleýmettik jeli óz qoldanýshylarynyń barshasyna tezirek usynyp otyr.
