Feısbýkte áıeliniń bosanǵanyn taratqan amerıkalyq avtorlyq quqyq boıynsha sotta jeńildi
ASTANA. QazAqparat - Sot Kalıfornııa turǵyny Kalı Kanongatanyń Facebook Live tikeleı efırinde áıeliniń bosanǵan vıdeosynyń kadrlaryn qoldanǵan telearnalar men saıttarǵa qarsy talap aryzyn qanaǵattandyrmady. Sot talapkerge $120 000 kóleminde sot shyǵynyn óteýge mindettedi. Bul týraly Ars Technica habarlady.
2016 jyldyń mamyr aıynda Kanongata 45 mınýt boıy áıeli Sara Doýnnyń ulyn bosanyp jatqan sátin tikeleı efırge túsirgen. Bir táýlikte onyń taspasyn 180 myńnan astam qoldanýshy tamashalaǵan, al birneshe telearna bul týraly sıýjet túsirgen. Kanongata NBC jáne ABC telearnalaryn tańerteńgilik shoýlarda qoldanǵany úshin sotqa bergen. Sondaı-aq, Yahoo kompanııasy men COED Media Group ýnıversıtettik jańalyqtar agenttiginiń ústinen óz saıttarynda tikeleı efırdiń qysqasha úzindilerin jarııalaǵany úshin shaǵym túsirgen. Ol jýrnalısterge avtorlyq quqyqtyń buzylǵanyn málim etken.
2017 jyldyń aqpanynda sýdıa Lıýıs Kaplan bul kompanııalardyń vırýstyq vıdeony qoldanýǵa tolyq quqyly ekendigi týraly úkim shyǵarǵan. Sebebi, talap qoıýshy myńdaǵan aýdıtorııasy bar áleýmettik jelige óz erkimen vıdeony salǵan.
Endi sýdıa tórt kompanııanyń sot shyǵyndaryn óteý úshin oǵan $120 000 tóleýge mindettedi.
