Feısbýkke qatysty daý-damaı: Tsýkerberg Eýroparlamentke shaqyryldy

BRıÝSSELЬ. QazAqparat - Eýropalyq parlament depýtattary Feısbýktiń negizin qalaýshy Mark Tsýkerbergten jeke málimetterdiń teris paıdalanylýyna qatysty daý-damaı boıynsha túsinik berýi úshin EP-ǵa kelýin surady. Bul  týraly «QazAqparat» HAA menshikti tilshisi habarlaıdy.

Sondaı-aq, depýtattar áleýmettik jelilerdiń yqpalyna, jalǵan jańalyqtardyń taralýyna jáne saılaý kezindegi aıla-sharǵyǵa qatysty alańdaýshylyq tanytyp otyr.

Eýropalyq parlament prezıdenti Antonıo Taıanı Týıtterdegi paraqshasynda Mark Tsýkerbergke joldanǵan hatty jarııalady.

«Barlyq saıası toptar AQSh kongresindegi kezdesý sekildi, munda ózińizdiń jeke kelýińizdi suraıdy», - dep atap ótti Taıanı.

Eýroparlament prezıdenti Tsýkerbergke Feısbýktiń vıtse-prezıdenti Djoel Kaplannyń kelgeni jetkiliksiz ekendigin aıtyp, depýtattar aldynda jaýap berýin taǵy surady.

EP basshysy «Feısbýk kompanııasynyń EO zańnamasyna sáıkes Dýblınde tirkelgenin» eske saldy, sondyqtan eń iri áleýmettik jeli «Eýroparlamentpen yntymaqtasyp, jaýap berýge mindetti». 

Aıta keteıik, budan buryn Feısbýk kompanııasy 50 mln astam qoldanýshynyń jeke málimetin Cambridge Analytica brıtandyq fırmasyna usynǵan  edi. Olar qoldanýshylardyń saıası kózqarastaryna taldaý jasaǵan. Áleýmettik jeli basshysy bolǵan oqıǵaǵa baılanysty keshirim suraǵan bolatyn. Al ótken aptada osy taqyrypqa baılanysty tyńdaý kezinde AQSh kongresi músheleriniń suraqtaryna jaýap berdi.