«Feısbýk» aýrý balanyń sýretin paıdalanyp aqsha jınamaq bolǵan akkaýnttardy óshirdi
ASTANA. QazAqparat - «Feısbýk» qaterli isikke qarsy emge aqsha jınaý úshin aýrý balanyń fotosyn jarııalaǵan eki akkaýntty óshirdi. Fotosýret ótken jyly túsirilgen, al ondaǵy sábı sheshek aýrýynyń aýyr túrine shaldyqqan. Qazir onyń deni saý, dep jazady Bı-bı-sı.
Áleýmettik jeliniń tehnıkalyq bólimine úsh jasar Djasperdiń anasy Sara Allen habarlasty: onyń oıynsha alaıaqtar Djasperdiń fotosýretin paıdalanyp, qarajat jınaǵysy kelgen.
Balanyń fotosýreti bar "Feısbýk" posttarynda áleýmettik jeliniń ota jasatýǵý qarajat bóletini aıtylǵan. Habarlamaǵa sáıkes, tólenetin soma «laık» basyp, pikir jazyp, jazbany bólisken adamdardyń sanyna baılanysty.
Nátıjesinde post astyna on myńdaǵan adam pikir qaldyryp, 1,2 mıllıonnan astam adam bólisken.
Sara Allenniń otbasy Kembrıdjshırde Seınt Neots qalasynda turady. Onyń oıynsha, akkaýnt ıeleri Djasperdiń sýretin jergilikti BAQ-tan alǵan.
Ótken jyly tamyz aıynda jergilikti basylym Djasperdiń aýyr syrqaty týraly maqala jazdy. Onda Djasperdiń anasy úkimetten barlyq naýqasqa sheshekke qarsy tegin vaktsına berýin suraǵan edi. Áleýmettik jelidegi akaýnt ıeleri Djasperdi qaterli isikpen aýyratyn bala dep jazǵan jáne ótken jylǵy sheshekpen aýyrǵan fotosýretin jarııalaǵan.
