Feık: Qazaqstandaǵy dári-dármektiń altydan bir bóligi – kontrafakt

ASTANA. QazAqparat – Jelide taraǵan vıdeoda belgisiz bireý Qazaqstandaǵy barlyq dári-dármektiń altydan bir bóligi – kontrafakt, al dárihanalardaǵy preparattar kóbinese paıdasyz ári qaýipti deıdi. Medıtsınalyq jáne farmatsevtıkalyq baqylaý komıteti muny túgeldeı joqqa shyǵardy, dep habarlaıdy QazAqparat StopFake.kz redaktsııasyna silteme jasap.

Vıdeodaǵy adam birden birneshe jalǵan tezıs keltiredi.

Birinshisi: Qazaqstandaǵy dári-dármektiń altydan bir bóligi – kontrafakt.

Ekinshisi: QR kedeninde «Fastým gel» preparatynyń partııasy tárkilendi, onyń vazelın burysh jáne lımon syǵyndysynan turatyny anyqtalǵan.

Úshinshisi: Qaraǵandyda 35 jastaǵy avtobýs júrgizýshisi «analgın» iship, jarty saǵattan keıin qaıtys bolǵan, dáriniń quramynda egeýquıryqqa qarsy ý bolǵan. Bul preparattan taǵy 16 adam ýlanǵan eken.

Tórtinshisi: Almatyda dárihanalardy tekserý kezinde «No-shpa» preparaty dep kádimgi bordy satý faktisi tirkelgen.

Medıtsınalyq jáne farmatsevtıkalyq baqylaý komıteti bul tezısterdiń bárin joqqa shyǵardy.

«Búgingi kúni Qazaqstan Respýblıkasynyń Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń aýmaqtyq departamentteri bul málimdeme boıynsha el aýmaǵynda dárilik zattar men medıtsınalyq buıymdardyń aınalymy salasynda zań buzýshylyq faktilerin anyqtaǵan joq jáne tirkemegen. Belgisiz dárisker aıtqan «faktilerdiń» eshqaısysy rastalmady, demek, bul aqparat shyndyqqa sáıkes kelmeıdi. Aıta keteıik, elimizde barlyq dári-dármek dárihanalarǵa jetkizilmes buryn qaýipsizdik men tıimdilik jaǵynan mindetti saraptamadan ótedi. Keshendi baǵalaýdy Dárilik zattar men medıtsınalyq buıymdardy saraptaýdyń ulttyq ortalyǵynyń sarapshylary júrgizedi (DZMBSUO). DZMBSUO sarapshylary qujattardy muqııat taldaıdy, klınıkalyq jáne klınıkaǵa deıingi zertteýler boıynsha derekterdi zertteıdi, zerthanalyq zertteýler júrgizedi. Sonyń qorytyndysy negizinde Medıtsınalyq jáne farmatsevtıkalyq baqylaý komıteti tirkeý kýáligin, ıaǵnı Qazaqstan Respýblıkasynyń aýmaǵynda ótkizýge ruqsat beredi. Sonymen qatar, dári-dármekterge turaqty farmakologııalyq qadaǵalaý jáne qoldaný kezeńinde medıtsınalyq ónimderge monıtorıng júrgiziledi, ıaǵnı preparattar men medıtsınalyq ónimderdiń sapasyn taldaý jáne baǵalaý búkil ómirlik tsıklde júzege asyrylady. Bul jumysty Komıtet ulttyq ortalyqpen birlesip atqarady», - dep habarlady vedomstvonyń baspasóz qyzmetinen.

Sondaı-aq, taralǵan rolıktiń eski ekenin atap ótken jón. Sýretterdi keri izdeý quralynyń kómegimen vıdeonyń alǵash ret 2019 jyldyń naýryz aıynda Facebook áleýmettik jelisinde jarııalanǵany anyqtaldy. Biraq, onda kimniń sóz sóılep turǵany jáne onyń qaıda túsirilgeni jazylmaǵan. Keıin bul rolık YouTube jáne Instagram sııaqty platformalarda da shyqqan, biraq keńinen taralmaǵan.

Rolık taraǵan 2019 jyly da, odan keıingi jyldary da BAQ pen áleýmettik jelilerde Qaraǵandyda qaıtys bolǵan júrgizýshi, shekarada belgili jaqpa maı partııasyn tárkileý, Almatyda dárihanalarda aýyrsynýdy basatyn dári retinde bor satylǵany týraly aqparattar shyqpaǵan. Qoryta aıtqanda, bul oqıǵalardy rolık keıipkeri oıdan shyǵarǵan.