Feık: Qazaqstanda qyzylsha aýrýynyń órshýine amerıkalyq bıozerthanalar sebep bolǵan
Áleýmettik jelilerde qyzylshamen aýyryp jatqandardyń kóbeıip kele jatqany qyzý talqylanyp jatyr, dep habarlaıdy Kazinform stopfake.kz saıtyna silteme jasap.
Osyndaı habarlamalardyń birinde Qazaqstanda qyzylshanyń órshýine el aýmaǵynda ornalasqan AQSh bıozerthanalary sebep bolǵan delingen. Qaýipti mekemeler aýrýdyń taralýy tirkelgen jerlerde ornalasqan eken.
Taǵy bir habarlamaǵa sáıkes, Shymkentte vırýs shashatyn avtobýs júr.
Keıbir paıdalanýshylardyń aıtýynsha, mektepterde mindetti túrde maskamen júrý qajet. QR Densaýlyq saqtaý mınıstrligi bul qaýesetterdi joqqa shyǵardy.
Vedomstvonyń habarlaýynsha, áleýmettik jeliler men messendjerlerde taralǵan qyzylshanyń taralýy AQSh zerthanalarymen baılanysty ekendigi, sondaı-aq Shymkentte vırýs shashatyn avtobýs júrgeni týraly aqparattar shyndyqqa janaspaıdy. Sondaı-aq bilim berý mekemelerinde qyzylshanyń taralýyna baılanysty maska taǵý rejımin engizý qarastyrylmaǵan.
Qyzylsha aýa tamshylary arqyly beriletin jáne aýyr asqynýlarǵa jáne ólimge ákelýi múmkin jedel juqpaly vırýstyq aýrý.
2000-2021 jyldary qyzylshaǵa qarsy vaktsınatsııalaý nátıjesinde 56 mıllıon adam aman qaldy.
Qazaqstanda 2023 jylǵy 1 qarashada QR Bas memlekettik sanıtarlyq dárigeriniń «Qyzylshaǵa qarsy sanıtarııalyq-epıdemııalyq jáne sanıtarııalyq-profılaktıkalyq is-sharalardy júrgizý týraly» qaýlysy shyqty.
2023 jyldyń 6 qarashasynda qyzylshaǵa, qyzamyqqa jáne parotıtke qarsy qosymsha jappaı ımmýndaý bastaldy. 6 aılyq baladan 10 aı 29 kúndik balalarǵa ekpe salynýda.
Buǵan deıin QR Densaýlyq saqtaý mınıstrligi Qazaqstan aýmaǵynda 30 amerıkalyq zerthana ornalasatyny týraly feıkti joqqa shyǵarǵan bolatyn. Vedomstvo «QR aýmaǵynda ózge memleketterdiń bıozerthanalaryn ornalastyrý josparda bolmaǵan jáne josparlanyp otyrǵan joq» dep habarlady.
