Feık: Epıdemıolog Sars-CoV-2 vırýsynyń eshqashan oqshaýlanbaǵanyn rastady
Búginde bul teorııany jaqtaýshylar áleýmettik jelilerde jáne messendjerlerde patogen Koh postýlattaryna sáıkes bólinbegen dep málimdegen doktor Igor Gýndarovtyń suhbatymen bólisýde. Munyń bári ótirik, dep habarlaıdy QazAqparat stopfake.kz saıtyna silteme jasap.
Igor Gýndarov Reseıdiń «eń qurmetti epıdemıology» emes. Onyń medıtsınalyq bilimi bar jáne RJǴA akademıgi. Alaıda, bul akademııaǵa bilimi joǵary jáne múshelik jarna tóleýge daıyn kez kelgen adam múshe bola alady.
Bul Gýndarovtyń vırýsologııa nemese epıdemıologııa salasyndaǵy bedeldi tulǵa ekeniniń belgisi emes. Sonymen qatar, ol buǵan deıin COVID-19 pandemııasy týraly jalǵan jáne ǵylymǵa qarsy aqparat taratqan.
Onyń Sars-CoV-2 vırýsy eshqashan oqshaýlanbaǵan degen sózderi de ótirik.
Koh postýlattary adamzat vırýstardyń bar ekendigin anyqtaǵanǵa deıin shyqqan. Kohtyń ózi tiri kezinde «Mıkroorganızm aýrý adamdardyń (nemese janýarlardyń) aǵzasynda udaıy bolady jáne saý adamdarda bolmaıdy» degen birinshi postýlattan bas tartqan. Sebebi ish súzegi men tyrysqaqtyń sımptomsyz tasymaldaýshylary anyqtaldy.
Kohtyń ekinshi postýlatyn vırýstarǵa da tolyq dárejede qoldanýǵa bolmaıdy. Onda: «Mıkroorganızm naýqas adamnan (nemese janýardan) oqshaýlanýy tıis jáne onyń shtamy taza ósindi boýly kerek» delingen. Vırýstar tiri jasýshadan tys ómir súre almaıtyndyqtan, taza ósindi alý múmkin emes.
Sondyqtan Tomas Rıvers Kohtyń postýlattaryn qaıta qarap, olardy vırýstarǵa qoldanýǵa bolatyndaı etip beıimdedi.
Sars-CoV-2 vırýsy osy buryn qaıta qaralǵan postýlattarǵa sáıkes tolyǵymen oqshaýlandy.
Onyń genomy da tolyq ashylyp, zerttelgen, al vırýstyń mıkroskoppen túsirilgen fotosýretin jeliden ońaı tabýǵa bolady.
Sars-CoV-2 vırýsyn Koh postýlattaryn saqtaı otyryp, oqshaýlamaǵan degen teorııany qazaqstandyq jáne sheteldik faktchekerler birneshe ret joqqa shyǵardy.
Demek, Igor Gýndarovtyń SARS-CoV-2 koronavırýsy oqshaýlanbaǵan, demek, ol – joq degen sózderi jalǵan. Patogen oqshaýlanǵan, onyń genomy ashyldy jáne alynǵan málimetter negizinde olardyń áserinen týyndaıtyn aýrýǵa qarsy tıimdi jáne qaýipsiz vaktsınalar jasaldy.
